ئه‌نجومه‌نی ئاسایش له‌سه‌ر داوای روسیا كۆ ده‌بێته‌وه
ئه‌مڕۆ ئه‌نجومه‌نی ئاسایشی نێوده‌وڵه‌تی كۆده‌بێته‌وه، چه‌ند سه‌رچاوه‌یه‌كی دیپلۆماتیش رایده‌گه‌یه‌نن، روسیا داوای كۆبو‌ونه‌وه‌كه‌ی كردووه به‌هۆی هه‌ڕه‌شه نێوده‌وڵه‌تیه‌كان له‌سه‌ر ئاشتی‌‌و ئاسایش.
چه‌ند سه‌رچاوه‌یه‌كی دیپلۆماتی رایانگه‌یاند: تا ئێستا به‌رنامه‌ی كاری كۆبو‌ونه‌وه‌كه نادیاره.
دوای ئه‌و داوایه‌ی روسیا، به‌ریتانیاو فه‌ره‌نساو ئه‌مریكاو پۆڵه‌نداو هۆڵه‌نداو سویدو كوه‌یت‌و پیرۆو كۆتدیڤواریش داوایانكرد، ئه‌نجومه‌نی ئاسایش دانیشتنێك ئه‌نجام بدات له‌باره‌ی هێرشه كیمیاویه‌كه‌ی سوریا.
هه‌ر به‌پێی ئه‌و سه‌رچاوانه دوێنێ رێككه‌وتن كراوه له‌سه‌ر ئه‌وه‌ی ئه‌مڕۆ دووشه‌ممه له‌جیاتی دوو دانیشتن، یه‌ك دانیشتنی ئه‌نجومه‌نی ئاسایش ئه‌نجام بدرێت.
نیكی هالی، باڵیۆزی ئه‌مریكا له نه‌ته‌وه‌یه‌كگرتوه‌كانیش رایگه‌یاند: پێویسته ئه‌نجومه‌نی ئاسایش هه‌ڵویستێكی یه‌كگرتووی هه‌بێت‌و پشتیوانی لێكۆڵینه‌وه‌یه‌كی سه‌ربه‌خۆ بكات له‌رووداوه‌كه‌و سزای ئه‌نجامده‌رانی ئه‌و كاره قێزه‌ونه بدرێت.
خوێندراوەتەوە431