ساختەكارییەكانی یەكێتی و پارتی لەهەڵبژاردنەكاندا هەموو سنورێكیان تێپەڕاندووە

مەریوان وریا: دەسەڵات بەساختەكاری دەیەوێت خەڵك نائومێدبكات لەهەموو شتێك
مەریوان وریا:  دەسەڵات هیچ بەدڕەوەشتییەك نامێنێتەوە پەنای بۆ نەبات بۆ نائومێدكردنی خەڵك
بەرهەم مستەفا: یەكێتی هەڵبژاردنەكانی ئەتككرد
بەرهەم مستەفا: هیچ هۆكارێك نیە بۆ ئەوەی دەنگی یەكێتی زیادبكات

دەسەڵات لەهەرێم بەساختەكارییە بێ سنورەكانی لەلایەك دەیانەوێت دەنگی راستەقینەی خەڵك بدزن و لەلایەكی تریشەوە دەیانەوێت خەڵك لەهەموو پرۆسەیەكی گۆڕان وگۆڕانكاری نائومێدتربكەن، نوسەرێكیش دەنوسێت دەسەڵات لەپێناوی نائومێدكردنی خەڵكدا بەدڕەوەشتییەك نامێنێتەوە پەنای بۆ نەبات، هاوكات داواشدەكات بیر لەپلانەكانی سبەینێ و دوسبەی و سێ سبەینێ بكرێتەوەو زمان وخەون و ئەخلاقاتی بەرگریكردن بچێنرێتەوەو بەهێزتربكرێت، ئەندامێكی یەكێتی مامۆستایانیش رایدەگەیەنێت یەكێتی هەڵبژاردنی ئەتككرد.

هەرلەگەڵ ئاشكرابوونی ساختەكارییەكەی یەكێتی و پارتی لەهەڵبژاردنەكەی پەرلەمانی عێراق لەناوچەكانی ژێردەسەڵاتی خۆیان، چەكدارەكانی یەكێتی دەستیانكرد بەتەقەكردن و پەلاماردانی بزوتنەوەی گۆڕان لەگردی زەرگەتە، ئەویش بەئامانجی رازیكردنی گۆڕان بەدەرئەنجامەكان و سەپاندنی واقیعێك كە بەساختە دروستیانكردووە، هاوكات مەبەستی سەرەكیشیان لەو ساختەكارییە و كەوتنەوەی ئەنجامەكان بەو شێوەیە تەنها نائومێدكردنی زیاتری خەڵكی و بەسوك و هیچ سەیركردنی پرۆسەی هەڵبژاردن و دەنگدان بوو.

مەریوان وریا قانیع نوسەرو رۆشنبیر لەوتارێكدا بەناونیشانی (دژ بە نائومێدی) ئاماژە بەوەدەكات هیچ رێگایەك هێندەی رێگای نائومێدبوون ئاسان و سوك نیە و هیچ شتێكیش لەوە بێكێشەتر نیە لەژورەكەی خۆتدا دابنیشیت و بەهەموان بڵێیت (نەموت هیچ ناكرێت و هیچ ناگۆڕێت!)، ئەوە نوسەر ئەوەشدەخاتەروو ئەوانەی دەیانەوێت دونیا بگۆڕن هەرگیز بەراستەرێیەكی بێ گرێ و گۆڵ و پڕ مەترسیدا نەڕۆیشتون و ناشڕۆن.

مەریوان وریا قانیع دەنوسێت : ئەوەی ئەمڕۆ لەكوردستاندا روودەدات لوتكەی هەوڵی دەسەڵاتدارانە بۆ لەناوبردنی هەموو ئومێد و چاوەڕوانیەكی پۆزەتیڤ لای ئینسانی ئێمە، ترۆپكی كاردنیانە بۆ گۆڕینی مرۆڤی كوردستان بۆ بونەوەرێكی خەمناك و داخراو بەسەر نائومێدی و بێدەبەرستیەكی گەورەو سەرتاسەریدا، هەوڵدانێكی هەمەلایەنە بۆ سڕینەوەی رەهەندە سیاسیەكانی كەسایەتی مرۆڤی ئەو دەڤەرەو هێشتنەوەی وەك رەعیەتێكی بێ ماف و بێ نرخ و بێبەها، لەم پێناوەشدا بەدڕەوەشتی نامێنێتەوە پەنای بۆ نەبەن.

مەریوان داواشدەكات بیر لەپلانەكانی سبەینێ و دوسبەی و سێ سبەینێ بكرێتەوەو زمان وخەون و ئەخلاقاتی بەرگریكردن بچێنرێتەوەو بەهێزتربكرێت.
هاوكات بەرهەم مستەفا ئەندامی سكرتارییەتی یەكێتی مامۆستایانی كوردستان لەوتارێكیدا بەناونیشانی (یەكێتی هەڵبژاردنی ئەتكرد) ئاماژە بەوەدەكات یەكێتی وپارتی لەساڵی 1992 هەرچی هەڵبژاردنێك بەڕێوەچوبێت تەزویریان تیاكردوەو لەم هەڵبژاردنەشدا بەیەكەوە ساختەكارییانكردوە.

بەرهەم مستەفا ئەوەشدەخاتەروو هیچ هۆكارێك نیە بۆ ئەوەی یەكێتی لەم هەڵبژاردنەدا دەنگی زیادبكات ئەویش بەهۆی شەریكایەتی لەگەڵ پارتی لەتاڵانكردنی كوردستان و وێرانتربونی كوردستان بەهۆی سیاسەتی ئابوری سەربەخۆ و بەشداری لەچارەكە موچە و فرۆشتنی خاكی كوردستان لە 16ی ئۆكتۆبەرو جیابونەوەی باڵێك و خۆخۆری لەناوخۆیدا.

بەرهەم مستەفا دەشنوسێت كەواتە هۆكارەكە روونە، هێزە دەرەكیەكان دەنگی خەڵكی كوردستایان دزی لەبەرژەوەندی یەكێتی و ئەمەش بەئەتكردنی دیموكراسی و هەڵبژاردنەكان لەقەڵەم دەدرێت.