کوردستان

هەرێمی كوردستان؛ مەهزەلەی هەڵبژاردن تۆڕەكۆمەڵایەتیەكانی تەنیوە

هەرێمی كوردستان؛ خەڵكی لە تۆڕە كۆمەڵایەتیەكانەوە توانج لە هەڵبژاردن دەدەن‌


هەرێمی كوردستان؛ خەڵكی لە تۆڕە كۆمەڵایەتیەكانەوە توانج لە هەڵبژاردن دەدەن

فەزاحەتی ساختەكارییەكەی دەسەڵات لە پارێزگاكانی هەرێمی كوردستان و كەركوك ئەوەندە ئاشكرابوو، تۆڕەكۆمەڵایەتییەكانیان پڕكردووە لە نوكتەی هەڵبژاردن و یەكێك نوسیویەتی، لەم هەرێمەدا داهێنان بەردەوامەو لەدوای سیستیمی پاشەكەوتی مووچە، سیستمی پاشەكەوتی دەنگیشیان داهێنا.

ئەنجامە سەیرو سەمەرەكانی هەڵبژاردنە پەرلەمانییەكەی عێراق لە لایەك خەڵكی تووشی بێزاری و تووڕەیی كردووە، لەلایەكی تریشەوە بووەتە مەهزەلەی ناو تۆڕە كۆمەڵایەتییەكان و كۆڕو كۆبوونەوە جەماوەرییەكان.

پێكەنینی گاڵتە ئامێزی ئەم گەنجە لەسەر ئەنجامی هەڵبژاردنەكەی ١٢ی ئایار بە شێوەیەكی بەرچاو لە تۆڕە كۆمەڵایەتیەكاندا بڵاوبووەتەوە، دەڵێت: لە حەویجە یەك دەنگی كوردی لێ نیە، كەچی لیستەكەی یەكێتی نیشتیمانی كوردستان یەكەم بووە، دەشڵێت: هاككەری سیستمەكە ئەوەندە نەشارەزا بووە حەویجەی كردووە بە هەڵەبجە.

یەكێتی و پارتی لە هەڵبژاردنەكانی ڕابردوودا بەوەوە نەوەستان دەنگی مردووەكان بدزن، بەڵكو ئەمجارە دەنگی زیندووەكانیشیان دزی و هەڵبژاردنیان كردە شانۆگەرییەكی بێمانا.

ئەو جووت حزبە لە ماوەی ٢٧ ساڵی ڕابردوودا تەنها بە دزینی خێرو بێری ئەم وڵاتەوە نەوەستان، ئەمجارە دەنگ و ئیرادەی خەڵكیشیان بە ڕۆژی ڕووناك لەسەر سندووقەكانی دەنگدان دزی و بە ڕوویەكی قایمیشەوە خۆیان لێ بێبەری كرد.

پەتای ساختەكارییەكەی ئەمجارە تەنها دەنگی خەڵكی نەگرتەوە، تەنانەت بەشێكی زۆری كاندیدەكانیش نەبوونە خاوەنی ئەو دەنگەی خۆشیان كە بەخۆیانیانداوە.

د. ڕێبوار كەریم سەرۆكی لیستی هاوپەیمانی بۆ دیموكراسی لە سلێمانی دەڵێت: لەو وێستگەیەی كە ڕۆژی ١٢ی ئایار دەنگی لێ داوە، تەنانەت یەك دەنگیشی نەهێناوە، واتە كار بە ئەنجامی دەنگەكان نەكراوە لەكاتی هەژماركردنیاندا.

لێرەدا ئەگەر بڕوا بەو ساختەكارییە نەكرێت، دەبێ بوترێ بڵێی ماڵباتێك دەنگ بە كاندیدەكەی خۆیان نەدەن و داوا لە خەڵك بكەن دەنگی پێ بدەن؟ 

هاوڵاتییەكیش بە تەنزەوە نوسیویەتی: لە هەرشوێنێك یەكێتییەكتان بە فلاش و میمۆرییەوە بینی، لێی ڕاكەن، نەوەك هاكتان بكات و بتانكات بە ئەندامی حزبەكەی خۆی.

مەهزەلەی هەڵبژاردنەكە بەجۆرێك بوو خەڵك ئێستا گوومانی لە مۆبایلەكەی خۆیشی هەیە: هاوڵاتییەك نوسیویەتی دوای بڵاوبوونەوەی هەواڵی هاك كردن و ساختەكردنی دەنگەكان، مۆبایلەكەی دەست بەجێ لە فۆتۆو نوسینە تایبەتەكانی پاك كردووەتەوەو چیتر متمانەی پێی نەماوە.

كەسێكیتریش نوسیویەتی، لەم هەرێمەدا داهێنان بەردەوامەو لەدوای سیستیمی پاشەكەوتی مووچە، سیستمی پاشەكەوتی دەنگیشیان داهێنا.

كورد دەڵێ هەمووشت بەخوێ، خوێش بەمانا، ئێستا خەڵكی ناڕازی دەلێن: هەموو هەلبژاردنێك بەتەزویر، تەزویریش بەمانا، ئێستا ئەبێ بڵێیت دەنگەكەت بۆ كێ دزرا، نەك دەنگت بەكێدا.

دەسەڵاتدارانی یەكێتی و پارتی نەك نەیانتوانی ئیدارەی ئەم هەرێمە بدەن، بەڵكو شكۆیان بۆ هیچ دامو دەزگاو پرۆسەیەكی دیموكراسی و بۆنە ئایینی و نەتەوەییەكانیش نەهێشتووەتەوە.

پرۆسەی خوێندنیان ئیفلیج كرد تا نەوەیەكی ئیفلیج لە داهاتوودا بەرهەم بێت، تەندروستییان شكست پێ هێنا تا خەڵكی بە جەستەیەكی نەخۆشەوە بژی، بۆنەكان و شەهیدەكانیان بە حزبی كرد، تا خەڵكی ئینتیمای بۆ خاكەكەی نەبێت، شكۆی دامەزراوەكانی پەرلەمان و حكومەتیان نەهێشت، تا لەپاڵیدا دزی و تالانی بكەن، پرۆسەی هەڵبژاردنیشیان بەم جۆرە لێكرد، تا خەڵكی بێ هیواو بێ ئومێد بكەن لە گۆڕانكاریی.


تێبینی بنوسە

خوێندراوەتەوە1120