رونكردنه‌وه‌یه‌ك له‌ دیجیتاڵ میدیای KNNه‌وه‌

‌

دوێنێ (11/5/2018) كاتژمێر 5.00ی ئێواره و ئه‌مڕۆ 12/5/2018‌ كاتژمێر 12.00، هێرشی ئه‌له‌كترۆنی كرایه‌ سه‌ر دۆمه‌ین نه‌یمی سایته‌كه‌مان (www.knn.krd) كه‌ دۆمه‌ین نه‌یمێكی كوردییه‌ و له‌لایه‌ن به‌ڕێوه‌به‌رێتی (ئای تی) حكومه‌تی هه‌رێمه‌وه‌ له‌ هه‌ولێر كاره‌كانی رێكده‌خرێت، ئه‌وه‌ش به‌ هاوكاری له‌گه‌ڵ كۆمپانیایه‌كی نێوده‌وڵه‌تی له‌و بواره‌دا...

له‌كاتێكدا هه‌رێمی كوردستان له‌به‌رده‌می ئه‌نجامدانی هه‌ڵبژاردنی ئه‌نجومه‌نی نوێنه‌رانی عێراقدایه‌ و لایه‌نه‌ به‌زیوه‌كانی به‌رده‌م جه‌ماوه‌ری بزوتنه‌وه‌ی گۆڕان هه‌موو رێگایه‌ك ده‌گرنه‌به‌ر بۆ گه‌یاندنی په‌یامه‌ سیاسیه‌كانیان و ده‌یانه‌وێت متمانه‌ی دامه‌زراوه‌ فه‌رمییه‌كانی حكومه‌تی هه‌رێم بخه‌نه‌ ژێر پرسیاره‌وه‌.

خه‌ڵكی كوردستان و ده‌نگده‌رانی بزوتنه‌وه‌ی گۆڕان دڵنیا ده‌كه‌ینه‌وه‌، كه‌ ئه‌و هه‌وڵانه‌ هیچ كاریگه‌رییه‌ك له‌سه‌ر وره‌ و تواناكانمان ناكات و تۆپخانه‌ی KNN هه‌میشه‌ ده‌ستناپارێزێت له‌و هێز و لایه‌ن و بنه‌ماڵه‌ و كه‌سانه‌ی بێدادییان به‌رامبه‌ر خه‌ڵكی كوردستان و مافه‌گشتییه‌كان ئه‌نجامداوه‌.

تیمی هونه‌ریی تایبه‌تمه‌ند به‌رده‌وام ده‌بێت له‌ به‌دواداچون بۆ ئه‌م هێرشه‌ سیاسی و مه‌به‌ستداره‌ی به‌ڵته‌جییه‌كان، هه‌ر فه‌رمانگه‌یه‌كی حكومی و حزبێكی سیاسی یان لایه‌نێكی دیاریكراو یان كۆمپانیایه‌ك له‌پشت ئه‌و هه‌وڵه‌ نه‌زۆكانه‌وه‌ بن، روبه‌ڕوی لێپێچینه‌وه‌ی یاساییان ده‌كه‌ین.

به‌رهه‌م عومه‌ر
به‌ڕێوه‌به‌ری دیجیتاڵ میدیای KNN
12/5/2018