عەبادی حەشدی خستە ریزی هێزە ئەمنییەکانەوە
حەیدەر عەبادی بە فەرمی و بە فەرمانێک هێزەکانی حەشدی شه‌عبی خستە ریزی هێزە ئەمنیەکانی عێراق، به‌وه‌ش ئه‌و هێزه له چوارچێوەی هیکەلیەتێکدا رێکدەخرێنەوە و چەکدارانی ئه‌و گروپه هەمان ماف و ئیمتیازاتی هێزە ئەمنییە فەرمیەکانی حکومەتیان دەبێت.
بەپێی ئەو فەرمانەی حەیدەر عەبادی، سەرۆک وەزیرانی عێراق دەریکردوە و لە حەوت ماددە پێکهاتوە و لە رۆژی پێنجشەممەوه كه‌وتوه بواری جێبەجێکردنه‌وه، حەشدی شەعبی وەک دەستەیەک دەچێتە ریزی هێزە ئەمنییەکانی حکومەتەوە و سەرۆکی دەستەی حەشدی شەعبی دەبێتە سەرۆکی باڵای دەستەکە و چەکداران و خۆبەخشانی حەشدی شه‌عبی هەمان مافی سەرباز و ئەفسەر و پلە باڵاکانی هێزە ئەمنیەکانیان دەبێت و هاوتا دەکرێن و سەرجەم ئەو ئەرک و ماف و دەسەڵاتانەیان دەبێت کە لە بڕیاری (177)ی ساڵی (2010)ی ئەنجومەنی وەزیران بە هێزە ئەمنییەکان دراوە.
هەر لەو فەرمانەدا هەیکەلی رێکخراوەیی و پلەکانی بەڕێوەبەر و ئەفسەران و ئەندامانی حەشدی شەعبی رێکخراوەتەوە کە لەسەرۆک باڵای دەستە و جێگرەکەیەوە بۆ فەرماندەی ناوچەکان بە چەند پلەیەک تا دەگاتە خۆبەخش و فەرمانبەر.
هەروەک تایبەتمەندی و مەرجەکانی ئەندامانی حەشد لە فەرمانەکەدا رونکراوەتەوە و تێیدا هاتوە؛ خۆبەخش و ئەندامی ریزەکانی حەشد دەبێت لانی کەم بڕوانامەی سەرەتاییان هەبێت و یاسای خانەنشینیش دەستەکە دەگرێتەوە.
خوێندراوەتەوە341