موسڵ له سفره‌وه ده‌ستی پێده‌كاته‌وه
ژیان له‌مووسڵ به‌م نزیكانه ناكه‌وێته‌وه سه‌رپێی خۆی، ئه‌و شاره له‌ناوه‌ندێكی بازرگانی گه‌وره‌وه هاتووه‌ته‌وه`ژێر سفر، شاره‌كه له‌ماوه‌ی ساڵێكدا به‌ته‌واوی كه‌وت و بوو به‌خۆڵه‌میش، هه‌رچه‌نده به‌شی ڕاستی شاره‌كه ئێستاش دوكه‌ڵی شه‌ڕی لێ به‌رزده‌بێته‌وه، به‌ڵام شاره‌كه ده‌یه‌وێت ده‌ست به ژیان بكاته‌وه و ناو به‌ناو خه‌ڵكی شاره‌كه ده‌گه‌ڕێنه‌وه و دوكان و ماڵه‌كانیان پاك ده‌كه‌نه‌وه.
دوای زیاتر له شه‌ش مانگ له ڕزگاركردنی موسڵ له‌ده‌ستی داعش، ئه‌و شاره هێشتا كێشه‌ی زۆری هه‌یه، له چه‌ند شوێنێكی كه‌می به‌ری ڕاستی شاره‌كه، چه‌ند هه‌وڵێك بۆ لابردنی پاشماوه‌ی جه‌نگ و ده‌ستكردنه‌وه به بونیادنانه‌وه هه‌یه، به‌ڵام هێشتا چه‌ند ساڵێكی دیكه‌ی پێویسته تا لانی كه‌م وه‌ك خۆی لێبێته‌وه.
موسڵ كه پێشتر به دڵی بازرگانیی عێراق له‌گه‌ڵ هه‌ریه‌ك له سوریا و توركیا داده‌نرا، به‌ڵام داعش و شه‌ڕ ئه‌و شاره‌ی كردووه‌ته ده‌سته‌خوشكی ستالینگرادی سۆڤێتی جاران كه شه‌ڕی ئه‌ڵمانیا و هاوپه‌یمانه‌كانی له‌لایه‌ك و سوپای سۆڤییه‌تی جاران له‌لایه‌كی تره‌وه شاره‌كه‌یان كرد به خۆڵه‌مێش.
له‌ناو گه‌ڕه‌كه‌كانی به‌ری راستی موسڵ به ده‌یان خاڵی پشكنین دانراون، شاره‌كه به‌ته‌واوی خامۆشه، ترس لێره‌دا ده‌بێته میوانی هه‌موو كه‌س، ئه‌وه‌ی به ساڵێك به‌سه‌ر ئه‌م شاره‌دا هێنراوه، پێویستی به‌ده‌یان ساڵی ترو ملیاره‌ها دۆلار هه‌یه تا بگه‌ڕێته‌وه دۆخی جارانی.
لێره‌و له‌وێ چه‌ند كه‌سێك خه‌ریكی خاوێنكردنه‌وه‌ی دوكانه‌كانییانن، شاره‌وانیش له‌چه‌ند شوێنێك ناوچه‌كه‌ی خۆیان پاك ده‌كه‌نه‌وه بۆئه‌وه‌ی له‌كاتی پێویست ده‌ست بكرێته‌وه به‌ژیان له‌م شوێنه كه رۆژانێك بوو جمه‌ی ده‌هات له خه‌ڵك و بازرگانی.
خوێندراوەتەوە763