سیروان حەمە رەشید

گۆڕان وەک دەلاقەیەک بۆ ئومێدبەخشی‌


کاتێک بزوتنەوەی گۆڕان وەک هێزیکی مەدەنی و جیاواز لەو پێکهاتە ناجۆر و ناشرینییەی حیزبەکانی تری لەسەر دروستبوە، هاتەمەیدان و بەگژ ئەو دەسەڵات و عەقڵییەتییەدا چوەوە کە کوردستانیان نوقمی گەندەڵ و وێرانەیی کردەوە و لە روی سیاسیەوە پێگەی هەرێمیان هێندە بچوک کردوەتەوە بەجۆرێک لەهاوکێشە سیاسیەکانی عێراق و ناوچەیی و نێودەوڵەتی زەلیل و بێ کاریگەر کرد.

لێرەدا دەڵێین بۆ گرنگە و پێویستە خەڵکی کوردستان پشتیوانی لە گۆڕان و لیستەکەی بکەن؟

 لەبەر ئەم  چەند  خەسڵەت و بنەما بنەڕەتیانەیەی بزوتنەوەی گۆڕانی لەسەر بونیادنراوە.

1. مانادانەوە بە چەمکی سیاسەت و کاری سیاسەتکردن وەک ئامرازێک بۆ چاکەی گشتی و هونەری بەڕێوەبردن و فەلسەفەی سیاسی.

2. لەدایکبونی گۆڕان دابڕان و تێپەڕاندنی مۆدیل و فۆڕمی حیزبی خێڵگەری و سەرۆکی موقەدەس هەتا هەتایی توڕدایە زبڵدانی مێژوەوە دەتوانین بڵێین  لەماوەی 80 ساڵی سەرهەڵدانی حیزبی کوردیدا داهێنانێکی ئێجگار ناوازە بو.

3. گۆڕان زەمینەی سەرهەڵدانی سیستەمی فرە حیزبی فراوانتر کرد و بەتەواوی لەکوردستاندا چەسپاندی.

4. بزوتنەوەی گۆڕان لەڕێگەی میکانیزم و ئامرازە مەدەنی و ئاشتخوازانەوە کردە پڕادایمی کاری حیزبی لەکوردستاندا. شێوازی ململانێی چەکداری و توندی حیزبایەتی گۆڕی بۆ ململانێی مەدەنی و گیانی  یەکتر قبوڵکردن.

5. گۆڕان سەرلەنوێ ئیرادە و هیوابەخشی گەڕاندەوە بۆ تاکی کوردی، کە تا ئەم ساتە پارتی و یەکێتی خەریکی چاندن و بڵاوکردنەوەی نائومێدی و رەشبینیکردنی خەڵک بون.

6. هەمو ئەو نوێنەرانەی چ لە پەرلەمانی کوردستانن چ ئەو نوێنەرانەی لە پەرلەمانی بەغدا و چ تیمی حکومەت و هەرێم وناوەندو چ ئەو نوێنەرانەی لە ئەنجومەنی پارێزگاکانی هەرێمدان. بەهەق داکۆکیکاری راستەقینەی مافە سیاسی و مەدەنییەکانی خەڵک و دەنگدەران بون.

بزوتنەوەی گۆڕان لەتەواوی ئاستەکاندا روبەڕوی تەحەدییەکانی بەردەمی بوەتەوە و قەڵەمبازی گەورەی داوە. دیارە دوای مەرگی نەوشیروان مستەفا گۆڕان پێدەنێتە قۆناغێکی نوێی جیاوازترەوە ئامادەیی تەواوی هەیە وەک هێزێکی دامەزراوەیی و کاریگەر بۆ هەڵبژاردنی ئەنجومەنی نوێنەرانی عیراق لە 12/5 لەبەرەم تاقیکردنەوەیەکی مێژویی و گەورەدایە بۆ دەرچون بەسەرکەوتویی لەو پرۆسەیەدا.

گۆڕان جەخت لەسەر شێوازی کاری مەدەنییانەی خۆی دەکاتەوە پابەندە  بەهزری ئاشتخوازانەی (نەوشیروان مستەفا)وە دیارە ئەویش لە رێگەی پیادەکردنی هەنگاوی مەدەنی و ئامرازەکانی دیموکراسیی ئەرکە ئەخلاقی و نیشتیمانیی و مرۆییەکانی جێبەجێدەکات، ئەو دۆخە شێوێنراوەی  کوردستان تێیکەوتوە بۆ جارێکی تر بێنێتە سەر رێگا دروستەکەی کاری حکومداری و سیاسەتکردن بۆ ئەوەی لانی کەم شکۆ بۆ مرۆڤ و هەیبەتی سیاسی هەرێم و هێزی پێشمەرگە بگەڕێنتەوە.

گەر سەرنج لەژینگەی بانگەشەی ئەمجارەی هەڵبژاردن بدەین دەبینن دوای نۆساڵ لەدروستبونی گۆڕان کەچی خۆشبەختانە هێشتا هەست بەوە دەکەین بەشێکی زۆری خەڵکی کوردستان بەحەماسەت و روحیەتی گۆڕانخوازانەوە   پشتیوانی بزوتنەوەکە دەکەن و بەهیوایەکی زۆرەوە دەڕواننە بزوتنەوەی گۆڕان و لیستی 142و پاڵێوراوەکانی، بێگومان ئەوەی جێگەی هیوابەخشیە بۆ خەڵکی کوردستان ئەوەیە گۆڕان پەیوەستە بە پەیڕەوکردنی سیاسەتی دروستیی خۆیەوە و پابەندە بەپڕەنسیپەکانی و رێبازە دەوڵەمەند و راستەکەی نەوشیروان مستەفاوە.

هەڵبەتە ئەمە وایکردوە هەمیشە گۆڕان لە سەنگەری خەڵکدا بمێنێتەوە و پەرۆشانە پێداگری لەجێبەجێکردنی بەڵێن و بەرنامە گشتگیرەکەی خۆی بکاتەوە. لەم بانگەشەیەدا گۆڕان وەک پارتی و یەکێتی لەئاست میللەتدا سەرشۆرڕ و شەرمەندە نییە، بەڵکو  بەپێچەوانەوە زۆر بەسەربەستی و سەربەرزییەوە بانگەشە بۆ بەرنامە سیاسیەکەی و کاندیدەکانی دەکات و داوا دەکات دەنگ بدەن بە لیستی ژمارە 142ی گۆڕان. دواجار ئەوەی  تاکە دەلاقەیە بۆ  هیوابەخشی بەدیهێنانی  ئامانجە باڵاکانی نیشتیمان ومیللەت تەنها و تەنها  گۆڕانە.

خوێندراوەتەوە214