سیروان حەمە رەشید

گشتپرسی یان...‌


"هەر هێزێک ڕابردووی کردە موڵکی خۆی. لەوە بترسە ئایندەش لەسەر مناڵەکانی تاپۆ بکات"ئاراس فەتاح.

کاتێک تەماشای  دۆخی سیاسی وئابووری ئێستای هەرێم و وئاستی بژێوی و گوزەرانی هاوڵاتییان دەکەیت. زۆر بەڕوون و ڕاشکاوانە درک بەو ڕاستییە دەکەین ئەم واقیعە دژوار و نەویستراوەی خەڵکی کوردستانی تێکەوتووە ڕۆژانە بەئازاری کوشندەوە ژیان بەڕێ دەکەن .

 هیچ جۆرە گومانێکی تێدا نییە ئەم هەلومەرجەی ئێستا.. بەپلەی یەکەم و سەرەکی سیاسەتی کورتبین و خۆشخەیاڵی و حەزی خۆسەپێنی لایەنێکی سیاسییەوە سەری هەڵداوە کە(پ.د.ک)ە  کەناوبەناو ئەم هێزە بۆ لەبیربردنەوەی کێشە سەرەکی و جەوهەرییەکانی هەرێم و دوور لە دنیابینی نیشتیمانی بانگەشەی خەیاڵپڵاوی سەربەخۆی و  گشتپرسی دەکات، کەبەڕای چاودێرانی سیاسی و ڕوناکبیر و ڕاپۆڕتە ڕۆژنامەوانییە ناوخۆیی و جیهانی ئەو هێزە تەنها توانای گەیشتن بە ئۆتۆنۆمی هەیە یان ڕاستترە بڵێین ویستی دەسەڵاتخوازی و میرنیشنی ناوچەی بچوکی هەیە نەک ئامانجی دروستبوونی دەوڵەتی کوردی.

  پرسیار ئەوەیە  هەر دوێنی بوو بێ گوێدانە و ڕێزگرتن لە ئیرادە ڕۆڵی لایەنەکانی دیکەوە دار وبەردی حوکومڕانی هەرێمیان بەسەریەکەوە نەهێشت وێرانی کرد. پێ دەچێت ئەو هێزانەی زۆر خۆشخەیاڵ بن بە بەیت و بالۆرەکانی پارتی، لەوانەیە زاکیرەیان لاوازبێت، یان لەپێناو هەندێک دەستکەوتی حزبی و شەخسیدا. خۆیان لە گێلی و کاڵفامی بدەن. 

بەشێوەیەک لوتبەرزی پارتی هەمو سنورەکانی ئیرادەی کۆمەڵگە وعورفی ناوخۆی و نێودەوڵەتی تێکشاندوە و لەشەرعیەت و بەهاکانی داوە. بەلۆژیک لولەیی تەڤەنگەکان و بەخەیاڵی هەڵگیرسانی شەڕی ناوخۆوە پەلاماری پەڕلەمان سەرۆکەکەی و بەشێک لە پەرلەمانتار و وەزیرەکانی داوە و بو جارێکی دیکە سنوری دێگەڵەی تۆختر کردەوە . 

دواجار گرنگە بزانین ئەمە ماهیەتی ونەهجی و تێکدانی یەک ریزی نیشتیمانی ئەو هێزەبێت.. نازانم بە چ پێودانگێک لایەنە پاشکۆکانی پارتی ئومێدییان لەسەر ئەو هێزە هەڵچنیوە؟ یاخود کێ و کام دامەراوەی شەرعی ئەو مافەی داوە بەهێرێک کە خۆی بکاتە خاوەنی پڕۆژەی ڕیفراندۆم . ئەو  ڕەوایەتی گەلە خاوەنی پروژەی ریفراندۆمە. نەک ئەو هێزەی بەدرێژایی تەمەنی سیاسی خۆی بۆتە بەڵا و نەگبەتی بەسەر خەڵک و نیشتیمانەوە. کەواتە دواجار دەکرێت دەست لە گەوجاندنی میللەت هەڵگرن بیر لە چارەسەری  نەهامەتی و ئازارەکانیان بکەرەوە واز لەسیاسەتی پاوانخوازی و داگیرکاری بێنن ئەوسا وەرە سەرباسی گشتپرسی و سەربەخۆیی کوردستان.

خوێندراوەتەوە301