نازانم چ مەخلوقێك بوو جارێكیان وتی:
"نێچیرڤان بارزانی پیاوی دەوڵەمەت مەدارە!"

ئەم رستە تێكشكاوە هەركەسێك وتبێتی، یان لەو چوار چێوەیەدا وتویەتی، كە لەو كاتەدا ئەشێت سودێكی بینیبێت، یان لەو چوارچێوەیەدا وتوویەتی كە هەرگیز بچوكترین بنەمای دەوڵەت مەداری نەزانیوە، بۆیە رستەی وا تێكشاوی وتووە.

گرنگ نیە رستەكە چەند تێكشكاوە و،گرنگیش نیە ئەم رستەیە كتومت بۆ حكومەتێكی تێكشكاو جگە لە قیژەیەكی خۆشی منداڵانە هیچ واتایەكی دیكەی نیە.

لێ‌، وەك هاونیشتیمانیەك لە شوێنی خۆمانەوە دەبێت بپرسین، ئەو كەسەی كە ناوی (نێچیرڤان بارزانی)یە، بۆ ماوەی (12) ساڵە لەسەر كورسی حوكومەت دانیشتووە! لەم ماوەی (12) ساڵەدا چیكرد؟

یەكەم:
هیچ پرۆژەیەكی ستراتیژیمان نەبینی، جگە لە وێستگەی كارەبای (هەولێر و سلێمانی) كە ئەوانیش وێستگەی كەرتی تایبەتن. ئەو دوو پاڵاوگەیەش واتە پاڵاوگەی (سلێمانی و هەولێر) هەردووكیان بەشێكی بە پارەی حكومەتی ناوەند دروستكران و بەشەكەی دیكەشی كەرتی تایبەتە. كەوایە بە درێژایی (12) ساڵ حكومرانی ئەم كەسە، توانای نەبوو پرۆژەیەك دروستبكات ستراتیژیی بێت و، بۆ ئایندەی هەرێمەكەمان باشبێت، لەكاتێكدا سەردەمی زێرینی رژانی پارە بەسەر هەرێمدا، سەردەمێك بوو، ئەم كەسە لەبری دروستكردنی پرۆژەی ستراتیژی، خەریكی نمایشكردن و پرۆژەی گەروگولی بێ‌ بنەما و، خەریكی (گەندەڵی، پیسخۆری) بوو.

دووهەم:
لە سەردەمی ئەم كەسەدا، كە سەردەمێكی زۆر دورو درێژە و مەگەر هەر ستەمكارە رۆژهەڵاتیەكان هێندە تاقەتیان هەبووبێت، ئەوەندە لەسەر كورسی دابنیشن. سەردەمێك بوو، هەرێمی كوردستان لەبری هەنگاو نان بەرەو پێشەوە، رۆژ بە رۆژ و ساڵ بە ساڵ، بەرەو دواوە دەچێت، تا بەم ئاخرییە گەیشتە ئەوەی، كە ئیدی نە موچە ماوە، نە روناكی ناو ماڵەكان، نە هیچ پرۆژەیەك و، سەرباری ئەمانەش قەرزارییەكی گەورە.

سێهەم:
لە ماوەی ئەم (12) ساڵەی ئەم كەسە شكستخواردوەدا، زۆربەی تەجاوزەكان ئەنجامدران. زۆربەی زەوی ناوشارەكان دابەشكران بەسەر ئەندامانی حیزبدا و بە تەسكیەی حیزبی، دەیان هەزار كەس دامەزران. هەر بە تەسیكەی حیزبی و ئینتیما بۆ حیزب، هەزاران كەس بە پلەی باڵا خانەنشینكران. تاوای لێهات حوكومەتی هەرێم لەكۆی پێكهاتەكەی تەنها پێویستی بە (530) هەزار فەرمانبەرە، كەچی (1) ملیۆن و زیاتر لە (530) هەزار موچەخۆری هەیە!  واتە سێ‌ هێندەی بارەكەی خۆی، بار خراوەتە سەرشانی حكومەتەكە! ئەمەش تەنها لە پێناو رازیكردنی حیزب و لایەنگرانی حیزب! ئیدی بێ‌ پلان و دوری لە بیركردنەوە بۆ ئایندە، ئەم دۆخەی دروستكرد.

چوارەم:
لەروی پەیوەندیەكانی حوكومەت و دراوسێكان. كۆی پەیوەندیەكان بچوككرانەوە بۆ پەیوەندی (بنەماڵەیەك) لەگەڵ دەرەوە. شتێك نەما بەناوی پەیوەندی حوكومەت! ئاستی پەیوەندییەكانیش هێندە خراپن، كۆی هێلكەكانی حوكومەتی خستە ناو سەبەتەی (توركیا) وە. بەناوی بەهێزكردنی كەرتی ئابوورییەوە، نەوتی هەناردەكرد و، لەبری بەهێزكردنی كەرتی ئابووری، كەرتی ئابووری وەك كابینەكەی خۆی تێكشكاند.

پێنجەم:
لەكاتە زێرینەكانی هەرێم، لەباتی بیركردنەوە بۆ ئایندە، دەستیكرد بە تەخشان و پەخشانكردنی داهاتی هەرێم. بەجۆرێك دەستیخستە ناو ئابووری هەرێمەوە، جیاوازییەكی گەورەی لەنێوان چینەكانی كۆمەڵگە دروستكرد. كاتێكیش بەرەو دارمان هات، چینی ناوەند كۆتایی هات و وەك وڵاتە بێ‌ پلان و شكستخواردوەكان دوو چین دروست بوونەوە، چینی سەرمایەدارەكانی لوتكە و ، چینی هەژارەكان. رۆژ بەرۆژیش ئەم جیاوازی چینایەتیە زیاتر دەردەكەوێت و ئایندەكەشی بەوە دەگات، رق لە چینەكان دروستدەبێت و توندوتیژی لەگەڵ خۆی دەهێنێت. ئەما چونكە كەسێكی بێ‌ پلان و نمایشكەرە، هەمیشە لەبری بیركردنەوە بۆ چارەسەر، بەشوێن چارەسەرێكی كاتی خراپتر لە شكستدا دەگەرێت.

ئەم پێنج خاڵە زۆر سەرەتاییە، تەنها لادانی پەردەیەكە بۆ بینینی بكەرێك، كە لە ماوەیەكی دورو درێژ لەسەر كورسی حوكومەت، جگە لە شكست شتێكی ئومێد بەخشی نەهێناوە لەگەڵ خۆی. جیاواز لەمەش بەردەوام لەشكرێك لە میدیای ستایشكەریی بە پارەی خەڵك دروستكردووە، بۆ بە ئەفسانە ناساندنی خۆی!

ئەفسانەبوونەكەشی ئەوەیە، پاش (12) ساڵ لە حوكمرانیەكەی، موچەی فەرمانبەرانی پێنادرێت. بەشێوەیەكی نارۆشن نەوت دەفرۆشێت و، داهاتەكەی روون نیە. پلانی نیە بۆ چارەسەركردنی كارەبا. پلانی نیە تەنانەت بۆ كابینەكەی خۆشی،كە توشی بیماری بووە و بیمارییەكانی بە گوتاری فریودەر دەشارێتەوە.

لەبری داوای لێبوردن لە شكستەكانی. لەبری داوای لێبوردن لەو هەموو قەرزەی هێناویەتیە سەر هەرێم. لەبری داننان بە شكستەكانی خۆیدا كە نەیتوانیوە ئیدارەی (3) شار بدات كە هەر (3) شارەكە هێندەی یەك گەرەكەی شارێكی وەك (تاران، ئەستەنبوڵ)ە. لەبری ئەم هەموو شكستانە كە بەردەوام لە رێگەی نەزانینی ئەم بكەرەوە توشی حوكومەتەكە دەبێت. هەوڵدەدات لەرێگەی میدیاكانی خۆیەوە كە بە پارەی خەڵك دەژین، شكستەكان بخاتە سەر ئەوانی دیكە.

بۆیە پێویستە  لەبری ئەو مەخلوقەی كە پێی دەوت:
" پیاوی دەوڵەت مەدارە! بوترێت: پیاوی گیرفان بەتاڵكردنەوەی خەڵكە."