نەبەز گۆران

سوخرەكێشی ئالی عوسمان ‌

بروای تەواوم بەوە هەیە كە:
(( هەرشتێك ماڵی بارزانی بیڵێن، یان هەر شتێك ئەوان بیكەن، پێچەوانەكەی بڵێ‌ و پێچەوانەكەی بكە، كوردێكی بێ‌ غەلوغەشی.))

كاتی خۆی لە وتارێكدا باسم لەوەكرد، نە دەبا هێزەكانی رۆژئاوا رێگا بدەن ئەو هێزەی پێشمەرگە لە رێگای توركیاوە، بچێتە ناو خاكەكەیان. نەك لەبەر ئەوەی دیدەم لەسەر هێزی پێشمەرگە گوماناوی بێت، بەڵكو لەبەر ئەوەی بۆم رونبوو كە ئەو رێككەوتنە، رێككەوتنێكە پاشان باجەكەی دەدەین.

 لێ‌، شەپۆلی هەست و سۆزی كۆمەڵگە تەنها ئەوكاتەی دەبینی و لەو كاتەدا دەژیا، بۆیە ئەو دیدەیان بەر نەفرەت دەخست! پێیان وابوو ئەوە دژی كوردایەتیە، نەیاندەزانی خەمەكەی من بۆ ئایندەیە و بۆ ئەو رێككەوتنە جەهەنەمییە لە پشتەوەكراوە و سبەی خاكەكەمان دەبێتە شوێن پێی، جەندرمە. لەو كاتەدا هێزە كانی رۆژئاواش هێندە حاڵیان خراپ بوو، بە هەموو هاوكارییەك دڵخۆش دەبوون، ئەگەرچی ئەوانیش دەیانزانی، رۆشتنی ئەو هێزە بەناو خاكی توركیادا، بێ‌ مەڵامەت نیە و ئەمرۆ خەریكە دەركەوتەی ئەو رێككەوتنە دەبینین.

ئەو هێزە توركیەی لە سەر رێككەوتنی نێوان، توركیا و بارزانی هاتوونەتە خاكی هەرێم، راستیەكەی هیچ پەیوەندی بە پەكەكەوە نیە. راستە لە رووی سیناریۆوە پەكەكە كراوەتە خاڵی بانگەشەی راگەیاندن. ئەما، پەیوەندی بە نەخشەی عوسمانیەكانەوە هەیە، بۆ ئایندەی (موسڵ و كەركوك).

چاوەروانكراوە لە ئایندەدا وردە وردە ئەو هێزە، بە بیانووی پاراستنی توركمانەكانی سەر هێڵی (ئاوریشم) واتە لە (موسڵەوە تا خانەقین)، ئەو هێزە نزیكبكرێتەوە لە شاری كەركوك.

ئەمە تەنها دیوێكی وێنەكەیە. دیوەكەی دیكە ئەوەیە، دەبێت بپرسین بۆچی لەم كۆتاییەدا بارزانی، بوییە سوخرەكێشی ئالی عوسمان و دەستی لە مەحكومی عەجەم هەڵگرت؟

گەر هەنگاوێك لەگەڵم بگەرێنەوە دواوە و، تەماشایەكی لاپەرەكانی مێژوو بكەین. دەزانین دوای ساڵانی (1975) ئیدی بارزانی و حیزبەكەی، خۆیانكردە مەحكومی عەجەم. یانی، لە ساڵانی (1979) پێش سوپای پازداران كەوتن بۆ سەركوتكردنی شۆرشی كوردانی رۆژهەڵات. توانیشیان لەگەڵ سوپای پازداران شكست بەو شۆرشەبهێنن و حیزبی دیموكراتی رۆژهەڵات، لە زۆربەی شارەكان وەدەربنێن.

بارزانی و حیزبەكەی تا راپەریین، كە نەخشە دانەرەكانی( نەوشیروان مستەفا و هاورێكانی بوون)، هەر مەحكومی عەجەم بوون.

دوای راپەریین، جارێكی كە گەرانەوە بۆلای ، كۆنە هەوار (دەسەڵاتی بەعس) ئەم گەرانەوەیان نائومێد بوون بوو، لە عەجەم (فارسەكان) چونكە، زۆریان بۆكردبوون و كەمیان پێدانەوە. بۆیە  لەگەڵ دەسەڵاتەكەی بەعس رێككەوتن و، تا (31) و پاش ئەویش،  بەردەوام بوون و بە پشت بەستن لەو دەسەڵاتە ستەمكارە، هێزەكەی بەرامبەر خۆیان، كە یەكێتی نیشتیمانی بوو، لە شاری هەولێر كردە دەرەوە.

دوای روخانی بەعس، راستەوخۆ بارزانی و حیزبەكەی، بەرەو توركیا وەر سوڕان و، خۆیانكردە سوخرەكێشی ئالی عوسمان. ئەمە سێهەمین وێستگەی بارزانی و حیزبەكەیەتی، كە خزمەت بە بێگانەكان بكات، لە پێناو مانەوەی خۆی و حیزبەكەی. دوای ئەم وێستگەیە ئیتر هیچ وێستگەیەكی دیكە شك نابان، پەنای بۆ ببات.
دیارە كە ئەم دڵخۆشییەی ئێستا هەیەتی، لەگەڵ ئالی عوسمان، لە ستراتیژی ئایندەدا زۆر بە باشی بەسەریدا دەشكێتەوە. هەروەك ئەوە وایە كە بە نوكتەی كرمەكە تەماشای بكەین.

((كرمێك دەچێت ئاوبخوات، گۆماوێك دەبینێت، بەرەو رووی دەروات و سەری پێوە دەنێت تێری لێ‌ دەخوات.نازانێت ئەو گۆماوە ئاونەبووە و شەرابی رژاو بووە. پاش كەمێك مەست دەبێت و لە خۆی دەگۆڕێت، دەڵێت:  من مارم.))
بارزانی و حیزبەكەشی ئەمرۆ بە پشت بەستن بە توركەكان و بە خۆكردن بە سوخرەكێشیان، لە هەمان دۆخی ئەو كرمەدان و خۆیان لێبوە بە مار. با شەپۆلی جوڵەكانی ناوچەكە و رۆژهەڵات، بەرەو شوێنی خۆیان بچن، ئەوكات تێدەگەین ئایندەی ئەو جوڵەیە، چ موسیەتێك بەسەر خۆی و حیزبەكەی دەهێنێت. مێژوو، ئێستا پێماندەڵێن، خزمەتكردنی بێگانە، ئاقیبەتەكەی تەماشا بكە، نەك سەرەتاكەی.

  ئەگەرچی ئەم بابایە و حیزبەكەی هەرگیز باكی بەوە نەبووە، هەمووشتێك بكات لە پێناو مانەوەیان، لێ‌ لەم دواهەمین وێستگەی سوخرەكێشیەدا نزیك دەبینەوە لە كۆتایی چیرۆكەكە.

خوێندراوەتەوە3596