میران عوسمان

تفەنگەکەی نەوشیروان مستەفا‌


بزوتنەوەی کوردایەتی و حیزب و رێکخراوەکانی میژوی سەد ساڵەی عێراقی عەرەبی، لە هەموو دەسەڵاتە یەك لە دوای یەکەکانی بەغدا، نادیموکراتیتر و نادادپەروەرتر بوون، چەمکەکانی حوکمڕانی تاکڕە و خۆسەپێن و دیکتاتۆر...هتد. چەکەکانی دەستی بزوتنەوەی کوردایەتی و حیزبەکانی بوە بەرامبەر حوکمی مەرکەزی، لە کۆتایی شەستەکانەوە چەمکی حوکمی ویراسی و بنەماڵە سیاسیەکان، لە بەرامبەر نەیارەکانی ناوخۆ و دەرەوە بو بە چەکێکی بەهێز و لە یەکەمین جیابونەوەی برایم ئەحمەد و هاوڕێکانی تا ئەم ساتەوەختە وەك بەهێزترین چەکی بیروباوەڕ رۆڵەکانی میللەتەکەمان و خوێندەوارەکانی بۆ بەرەی ململانێی سیاسی و چەکداری بردون و لەناوبردون، زۆر ناویش بن بە رەمزی ئەو بیروباوەڕە و بە شکۆوە چونە مێژوی بیری سیاسی و کوردایەتییەوە. حوکمڕانی خۆماڵی و بەرژەوەندی حیزب و کارەکتەرە سیاسیەکان لە دوای راپەڕین و دوای فەوتی رژێمی بەعسی عێراقی بەشێوەیەك ئەم چەمکەی کاڵ کردەوە، نوخبەی سیاسی و کادرە تێگەیشتوو پێشکەوتوەکانی حیزب بە شانازییەوە، وێنە و لەقەبی سەرکردەکان و خاو و خێزان و بنەماڵەکانیان لە قەد و باڵای خۆیان ئەدا، لە بەرامبەریشدا نوخبەی بێزار بو لەو رەفتارانە هاواریان بە کەس نەدەگەیشت.

بزوتنەوەی گۆڕان و نەوشیروان مستەفا توانیان ئەو چەکەی خەفە کرا بو جارێکیتر هەڵبگرنەوە و بەرامبەری نەیارەکانیان بەکاری بهێننەوە. سەلماندیشیان کە لە جاران زیاتر هێز و گوڕی ململانێی حیزبە سیاسیەکانی کوردستانی هەیە و بە خیتابە ئاگرینەکانی خودی کاك نەوشیروان و بزوتنەوەکە بەرامبەر حوکمی ویراسی و پاوان کردنی عەرز و ئاسمانی کوردستان لەلایەن بنەناڵە سیاسیەکانەوە توانی رقێکی پیرۆز لە ناخی خەڵکی کوردستاندا بچێنێ و وێنە کۆنەکانی پێشویان بۆ بخاتە سەر ئاوێنەی روداوەکانی ئەمڕۆ.

ئەگەر ئەوان بە شەرعیەتی شۆڕشگێڕی و ژیانی شاخ و دۆڵ و دیبلۆماسییەتی قسە و کاری سیاسی پەردەپۆش و پینە و پەڕۆیان کرد بو... بزوتنەوەی گۆڕان بە خیتابی کۆتایهاتنی شەرعیەتی شۆڕشگێڕی و خەباتی مەدەنی بە ئاسانی بت و باڵۆنەکانی بە زەمیندا خست و بە تەمەنێکی کەمی کاری سیاسی توانی ململانێی هێزی یەکەمی هەرێمی کوردستان بکات. 

دوای کۆچی نەوشیروان مستەفا، هەمو هەوڵ و تواناکانی نەیارەکانی ناوخۆ و دەرەوەی بزوتنەوەکە بۆ داماڵینی ئەو چەکە بو لە شانی هەڵسوڕاوەکانی بزوتنەوەکە، بەو مەبەستەش نەوەکانی نەوشیروان مستەفا تەنیا ئامانج و تەنیا ستراتیجی کاری ئەوان بو، نزیکەی ساڵێکە و ئەو هەنگاوانە بە چەندین رێگەی دیبلۆماسی، سیاسی، ئابوری، کۆمەڵایەتی بەردەوامە و ئەو ماکینە ئیعلامییە پەنجا ساڵ لە دژی نەوشیروان مستەفا و هاوڕێکانی لە گەڕدا بو، روی لە نەوەکانی نەوشیروان مستەفایە، ئەوانیش لە بەردام تاقیکردنەوەیەکی گەورە و گرانی ئەو مێژووەدان، ئایا دەیسەلمێنن کە ئارامگەکەی حوکمی مێژوو ئایندە دەکات و ئەو چەکەی بەکاریهێنا گوڕوتینی زیاترە، یان لەگەڵ کتێب و یادگاری و وێنەکانیدا، چەکەکەشی دەخەنە مۆزەخانەوە.

رۆژنامەی ئاوێنە، رۆژی سێ، ۲۷ـ۲ـ۲٠۱۸

خوێندراوەتەوە265