به‌رهه‌م عومه‌ر

كوردستان له‌چاوی به‌غداییه‌كانه‌وه‌‌


ئه‌و شۆفێره‌ی له‌به‌رده‌م ناوچه‌ی سه‌وز (منطقة الخضراء)ه‌وه‌ ده‌ستم لێڕاگرت و به‌ حه‌زه‌ر و هه‌ستیارییه‌وه‌ ده‌ستمكرد به‌ قسه‌كردن له‌گه‌ڵی، دوو سیفه‌تی هه‌بوو؛ حه‌شدی شه‌عبی بوو، عه‌ره‌به‌ هاورده‌كانی كه‌ركوكیش بوو كه‌ كورد ده‌ری كردبوون له‌و شاره‌... ئه‌وه‌ش به‌س بوو كه‌ رقی له‌ كورد بێت و وتی؛ "كورده‌كان... ئای چیتان لێ به‌سه‌رهێناین!!!". 

ئه‌و گه‌نجێكی ته‌مه‌ن 28 ساڵان ده‌بوو، یه‌كێك بوو له‌و چه‌كدارانه‌ی حه‌شدی شه‌عبی كه‌ له‌ 16ی ئۆكتۆبه‌ردا هاتبوه‌ كه‌ركوك، شه‌ڕی له‌گه‌ڵ پێشمه‌رگه‌ كردبوو، له‌به‌رئه‌وه‌ نه‌یده‌توانی ڕقی خۆی بشارێته‌وه‌ له‌ هه‌موو كوردێك، به‌ڵام كاتێك كاروانێكی ئۆتۆمبێلی به‌رپرسه‌ عه‌بوسه‌كانی به‌غدا به‌ته‌نیشتماندا تێپه‌ڕین و یه‌كێك له‌ پاسه‌وانه‌كان نیوه‌ی له‌شی له‌ ده‌رگای ئۆتۆمبێله‌ به‌رزه‌كه‌وه‌ ده‌رهێنابوو به‌ چه‌كه‌كه‌ی هه‌ڕه‌شه‌ی لێكردین كه‌ ته‌كسییه‌كه‌ خاوی بكاته‌وه‌ و له‌ ته‌نیشته‌وه‌ تێپه‌ڕێت رێگریی نه‌كرێت له‌ كاروانی به‌رپرسه‌كه‌، هه‌ر بۆیه‌ راستگۆیانه‌ یه‌ك قسه‌ی كرد و وتی؛ "ئای كورد، چه‌ند عێراقتان دواخست؟! واتانكرد ئه‌وه‌نده‌ی تر ئه‌م به‌رپرسه‌ گه‌نده‌ڵانه‌ی ئێمه‌ ببنه‌ به‌ڵا به‌سه‌رمانه‌وه‌ و زیاتر بمانچه‌وسێننه‌وه‌".

جه‌نگی داعش و ریفراندۆم و كۆنترۆڵكردنه‌وه‌ی كه‌ركوك و ناوچه‌ دابڕێنراوه‌كان، بوه‌هۆی ئه‌وه‌ی به‌رپرسه‌ باڵا گه‌نده‌ڵه‌كانی عێراق هیوایه‌كی دیكه‌یان بۆ بگه‌ڕێته‌وه‌‌ له‌ناو خه‌ڵكی عێراقدا و هیچ خۆپیشاندانێكی به‌هێز و جه‌ماوه‌ریی گه‌وره‌ نه‌كراوه‌ بۆ فشارخستنه‌ سه‌ر حه‌یده‌ر عه‌بادی و كابینه‌ حكومییه‌كه‌ی و خۆیان وه‌كو "زامنی یه‌كپارچه‌یی خاكی عێراق و گێڕانه‌وه‌ی سه‌روه‌ته‌ نیشتمانییه‌كان" نیشان ده‌ده‌ن و ده‌ستكه‌وته‌كانیان بۆ هه‌ڵبژاردنی داهاتوو كۆده‌كه‌نه‌وه‌.

پاش چه‌ندین ساڵ جارێكی دیكه‌ له‌ ته‌مه‌نێكی تردا و به‌ تێگه‌یشتنێكی تره‌وه‌ به‌ناو شه‌قامه‌ به‌ناوبانگه‌كانی به‌غدا و دامه‌زراوه‌ جیاجیاكانیدا گه‌ڕام، بونی ده‌رفه‌تێكی زۆر بۆ قسه‌كردن له‌گه‌ڵ خه‌ڵك و كاسب و چاودێره‌كان و رۆژنامه‌نوسه‌كان...هتد وێنه‌كه‌ به‌شێوه‌یه‌كی دیكه‌ ڕوونده‌كاته‌وه‌، كه‌ زه‌حمه‌ته‌ له‌ كوردستان به‌و تێگه‌یشتنه‌ بگه‌یت.

بڕیاری پێشوه‌خت ناده‌ین كه‌ كورد له‌ڕێی ریفراندۆمه‌وه‌ چی له‌ده‌ستدا و چی به‌ده‌ستهێنا! ده‌بێت هه‌ردوو لای وێنه‌كه‌ بخرێته‌‌ڕوو، خه‌ڵكی به‌غدا و شاره‌ عه‌ره‌بییه‌كانی دیكه‌ی عێراق ماندون به‌ده‌ست ئه‌م كاسته‌ سیاسیه‌ گه‌نده‌ڵه‌ی وڵاته‌كه‌یان به‌ڕێوه‌ده‌بات، ئه‌و سه‌ركردانه‌ی ئه‌گه‌ر به‌ربه‌سته‌ كۆنكرێتییه‌ 5 مه‌ترییه‌ به‌رزه‌كان نه‌بێت ناوێرن هه‌ر له‌ عێراقیشدا بژین، له‌ قافڵه‌ی سه‌ربازیی و ئه‌منی ئۆتۆمبێلی زرێپۆشدا نه‌بێت، ناوێرن بسوڕێنه‌وه‌. كه‌سیان نییه‌ پێڵاو و نه‌عل و ده‌به‌ی ئاوی تێنه‌گیرابێت! كه‌سیان نییه‌ بوێرێت به‌بێ ترس به‌چاوی سه‌ری خۆی دۆخی خراپی خزمه‌تگوزاری و رێگاوبانی لێكهه‌ڵوه‌شاوه‌ و چڵكنبونی هه‌موو دیمه‌نه‌كان ببینێت، به‌ڵام هێشتا هه‌ندێك له‌ به‌رپرسه‌ كورده‌كان خۆشه‌ویستن له‌لای خه‌ڵكی به‌غدا.

وڵاتێك ناتوانێت چاودێری له‌فه‌ فرۆشێكی چڵكن بكات، سه‌مونخانه‌یه‌كی ئامێر ژه‌نگاوی بكات، ناتوانێت چاودێری مۆلیده‌ی گه‌ڕه‌ك بكات بۆچی مانگێكه‌ كاره‌بای كه‌متر ده‌دات به‌ ماڵان و ده‌ستكاری واتیه‌ و ئه‌مپێری ماڵان ده‌كات، ئه‌و حكومه‌ته‌ی ئۆتۆمبێل و ئامێره‌كانی به‌ده‌ست عه‌سائیب و سه‌رایا و نوجه‌با...كانه‌وه‌یه‌ و جرت و فرتی پێده‌كه‌ن و ده‌خوڕن به‌سه‌ر خه‌ڵكدا و ناتوانێت لێیان وه‌رگرێته‌وه‌ یان لێپێچینه‌وه‌یان له‌گه‌ڵدا بكات، جه‌سته‌یه‌كی حكومی كه‌ ته‌نراوه‌ به‌ ڕه‌شوه‌ و به‌رتیل له‌ به‌رگی به‌خشیش و پاداشتدا، به‌ڵام ناتوانێت سنورێكی بۆ دابنێت، سه‌رۆكی وڵاتێك خۆی به‌ قاره‌مانی جه‌نگی تیرۆر ده‌زانێت، به‌ڵام ده‌بێت له‌ شاره‌كه‌ی خۆیدا یان به‌ فڕۆكه‌ هاتوچۆ بكات، یان به‌و شه‌قامه‌ی پێیدا تێده‌په‌ڕێت ژیان بوه‌ستێنێت و نه‌فه‌سبڕی بكات...هتد به‌ڵام كورد بگاته‌ دۆخێك ئه‌و حكومه‌ته‌ و ئه‌و سه‌رۆك وه‌زیرانه‌ بێت چاو بخشێنێته‌وه‌ به‌ لیستی موچه‌خۆره‌كانیدا و ئامۆژگاری بكات بۆ كه‌مكردنه‌وه‌ی هێزه‌  ئه‌منییه‌كانی و راستكردنه‌وه‌ی باری یاسایی حكومه‌ت و دامه‌زراوه‌كانی بۆ جێبه‌جێبكات!

به‌ ته‌كسیه‌كم وت، بمگه‌یه‌نه‌ بۆ وه‌زاره‌تی ده‌ره‌وه‌ی عێراق، وتی كام وه‌زاره‌تی ده‌ره‌وه‌؟! (ئه‌و وه‌زاره‌ته‌ چه‌ند شوێنێكی گۆڕیوه‌ و چه‌ند ده‌روازه‌یه‌كی هه‌یه‌) دیاربوو نه‌یده‌زانی كام وه‌زاره‌تی ده‌ره‌وه‌یه‌ ده‌ڵێم، دوایی وتی كاكه‌ بڵێ بمگه‌یه‌نه‌ بۆ (حه‌یده‌ر ده‌بڵ)، هه‌ر بۆیه‌ زوو تێگه‌یشتم كه‌ بۆچی فه‌لافلی حه‌یده‌ره‌ ده‌بڵ به‌ناوبانگتره‌ له‌ وه‌زاره‌تێكی سیادیی وه‌كو وه‌زاره‌تی ده‌ره‌وه‌ له‌لای خه‌ڵكی به‌غدا، ئه‌وه‌ش به‌هۆی دابڕاوی ئه‌و دامه‌زراوانه‌ له‌ ژیانی گشتی خه‌ڵك و گوزه‌رانیان.

ئه‌گه‌رچی دۆخی ئه‌منی شاری به‌غدا زۆر زۆر جێگیرتره‌ له‌ پێشتر و ته‌قینه‌وه‌كان نه‌ماون، به‌ڵام ئێستاش زۆرێك له‌ گه‌ڕه‌كه‌ سونییه‌كان به‌تایبه‌تی ئه‌وانه‌ی نزیكن له‌ فڕۆكه‌خانه‌ی به‌غدا و ناوچه‌ی سه‌وزه‌وه‌، هه‌موو سه‌رشه‌قامه‌كانیان مه‌فره‌زه‌ی پۆلیسی فیدراڵی لێجێگیركراوه‌ و ئۆتۆمبێل ده‌پشكنن و داوای كارتی نیشته‌جێبون ده‌كه‌ن و ئۆتۆمبێلی سه‌ربازیی له‌ زۆرینه‌ی شه‌قامه‌كان ده‌بینرێن.

خه‌ڵكه‌ هۆشیاره‌كه‌ی به‌غدا ده‌ڵێن، كورد بۆچی وای له‌خۆی كرد، بڕیاریان له‌سه‌ر هه‌موو شتێكی عێراق ده‌دا، هه‌رێمی كوردستان خه‌ریكبو ده‌بوه‌ مۆدێلێك كه‌ به‌غدای ئیحراج ئه‌كرد و پێیان ده‌وترا كه‌ بزانه‌ كورد به‌و بڕه‌ بودجه‌یه‌ی هه‌یانه‌، چۆن خزمه‌تی خۆیان كردووه‌ و دیارده‌ی چه‌كدارییان نه‌هێشتوه‌ و ئاوه‌دانی و ئارامییان هه‌یه‌ و بونه‌ته‌ جێگای گه‌شتیارانی هه‌موو شاره‌كانی تری عێراق، چۆن رێگاوبانیان رێكخستوه‌، شه‌قامی تازه‌یان دروستكردووه‌، چۆن ئه‌م هه‌موو كۆمپانیا به‌ناوبانگه‌یان هێناوه‌ته‌ خزمه‌تی ناوچه‌كانیان، چۆن هه‌ڵبژاردن ئه‌نجام ده‌ده‌ن و هه‌وڵی ده‌ستاوده‌ستكردنی ده‌سه‌ڵات تیایدا په‌ره‌ ده‌سه‌نێت...هتد. 

تێڕوانینی خه‌ڵكی به‌غدا بۆ كوردستان به‌و شێوه‌یه‌یه‌ و بۆت ده‌رده‌كه‌وێت، سه‌رانی ریفراندۆم، چ چاكه‌یه‌كیان به‌رامبه‌ر سه‌ركرده‌ گه‌نده‌ڵه‌كانی به‌غدا كرد و هه‌ناسه‌یه‌كیان پێ به‌خشینه‌وه‌، جارێكی تر كوردستان و شاره‌كانی دیكه‌ی عێراقیشیان به‌ره‌و دواوه‌ برده‌وه‌ و خه‌ڵكه‌ بێبه‌شه‌كه‌یان هێنده‌ی تر سزادا و پاره‌یان گێڕایه‌وه‌ بۆ ئه‌و گیرفانه‌ تاریكانه‌ی گاڵته‌ به‌ موچه‌ی مامۆستا و فه‌رمانبه‌ران و مافه‌كانی جوتیاران و خاوه‌ن كاره‌كان ده‌كه‌ن.


شوبات – به‌غدا


خوێندراوەتەوە1314