په‌یكار عوسمان

نان و ئازادی، ژیان و کەرامەت، دەوڵەت و سەربەخۆیی!‌


- لە نێوان هەواو ئاودا، ئاسایی هەوا زەرورترەو کەس نیە بێ هەناسە بژی، بەڵام کەسیش نیە بێ ئاو بژی!

دووانەی نان و ئازادیش بۆ ئەوەنیە یەکێکیان هەڵبژێریت، بۆ ئەوەیە هەردوکیان هەڵبژێریت، بۆ ئەوەنیە یەکێکیان هەبێ و ئەویتریان نەبێت، بۆ ئەوەیە هەردوکیان هەبن.

نان گرنگترە لە ئازادی، بەڵام نان هەوایەو ئازادی ئاو، ئاو چەنێك ڕەتئەکرێتەوە ئازادیش ئەونە.

داواکردنی نان ناکاتە داوانەکردنی ئازادی، شەڕی نان ناکاتە تەنازولکردن لە ئازادی، چونکە نان و ئازادی ڕکابەری یەك نین تەواوکەری یەکن، بە هەردوکیان مانای یەك جوملە تەواوئەکەن کە (ژیانێکی کەرامەتمەندانەیە) نان مانا بە ژیانەکە ئەداو ئازادیش بە کەرامەتەکە.

ئێستا نوخبەیەك بەهۆی 'دزییەوە' قەیرانی نان و بەهۆی کەڵکەڵەی دەسەڵاتی هەتاهەتاییشەوە قەیرانی دیموکراسی و ئازادی سیاسییان دروستکردووە، هەر ئەم نوخبەیە کە نان و ئازادیی ئێمەی بەم ڕۆژە ڕەشە گەیاندووە، پرۆژەی دەوڵەتیشی هەیە!

جا شەڕی ئێمە لەگەڵ ئەم نوخبەیە، شەڕی نان و ئازادیی و ژیان و کەرامەتەو دەوڵەتەکەش بەشێکە لەو شەڕە، شەڕی لێدانی هەموو پرۆژەکەیانە بە دەوڵەتەکەشەوە، ناکرێ بڵێین با ئەمەیان هاوبەشمانبێ و بیخەینە دەرەوەی ململانێکان! 

چونکە دەوڵەتەکە بێلایەن نیەو لەدەرەوەی ململانێکاندا نیە، لە دەرەوەی شەڕی ئەواندا نیە لەگەڵ ئێمە، بەڵکو قورسترین چەکی ئەوانە لە شەڕەکەدا، شتەکە لەدەرەوەی پرۆژەکەی ئەواندا نیە کە پرۆژەی زەوتکردنی نان و ئازادی و ژیان و کەرامەتی ئێمەیە، بەڵکو جەوهەری پرۆژەکەیە!

تۆ ناکرێ چوارچێوەیەك دروست بکەیت بۆ لێدانی من، پێشم بڵێیت وەرە با ئەم چوارچێوەیە هاوبەشمان بێت.

نان نادرێتە دەست دز، ئازادی نادرێتە دەست خۆسەپێن، ئەمانە دوو دەستی ئەمین نین بۆ ئەو دوو شتە کە قەرارە ژیانێکی کەرامەتمەندانەی لێ بەرهەم بێت.

بۆیە لێدانی ئەم نوخبە فاسیدەو پرۆژەکانیان، شەڕی مان و نەمانە بۆ ئێمە، بەڵام ئەم شەڕە بە دەستی بەتاڵ ناکرێ بە پرۆژە ئەکرێ!

- لێرەدا ئیتر پێویستە بەرامبەر پرۆژەی دەوڵەت، پرۆژەی سەربەخۆیی بێتە مەیدان!

چونکە سەربەخۆیی گشتگیرەو دەوڵەتیش ئەگرێتەوە. چونکە سەربەخۆیی ئەڵێ ی کۆکراوەی وشەکانی نان و ئازادی و ژیان و کەرامەتە. چونکە 'دەوڵەت' لە دەرەوەی مانای سەربەخۆییدا ستەمکارییەو، لەناو مانای سەربەخۆییدا ئینسانییە.

جا ئەوەی کە پێویستە ببێتە چەترو کۆمان بکاتەوە، سەربەخۆییە نەك دەوڵەت!

ئەمەش دەرەچەیەکی باشە بۆ هێزە سیاسییەکان، بۆ ئەوانەی کە دەوڵەتەکەیان بەدڵ نیەو ناشوێرن ڕەتی بکەنەوە، تاکە ڕێگا بۆ رەتکردنەوەی ئەم پرۆژەی دەوڵەتە، پرۆژەی سەربەخۆییە! 

تەنیا سەربەخۆیی توانای فشکردنەوەی ئەم میزەڵانی‌ دەوڵەتەی هەیە، چونکە سەربەخۆیی پاشەکشێ نیە لە مەسەلەی دەوڵەت کە حەزو مافی خۆمانە، بەڵکو ڕاستەقینەی دەوڵەتە.

چونکە سەربەخۆیی نایەڵێ دەوڵەت تامی دوژمن بدا، چ هی ناوخۆ چ هی دەرەکیی. (پێشتریش شتێکی وام نوسیوە بە ناوی خولە چەخماخەو خولەی چەخماخساز)

*بەڵێ ئەوە غیابی پرۆژەی سەربەخۆییە کە هەمووانی تەسلیمی پرۆژەی دەوڵەت کردوە.


خوێندراوەتەوە466