د. ئیسماعیل نامیق

بۆ له‌ په‌رله‌مان كه‌وتونه‌ته‌ ته‌قه‌؟‌


په‌رله‌مان به‌رجه‌سته‌كه‌ری‌ ویستی‌ خه‌ڵكه‌، جا هه‌ركه‌سێك بڕوای‌ به‌ دیموكراسیه‌ت هه‌یه‌، پێویسته‌ رێز له‌و ویسته‌ بگرێت، وه‌ خه‌ڵك ئازاده‌ كێ‌ هه‌ڵئه‌بژێرێت، بۆیه‌ نابێت به‌ بیانوی‌ ئه‌وه‌ی‌ خه‌ڵك هه‌ڵبژاردنه‌كه‌ی‌ دروست نیه‌، هه‌وڵبدرێت ویستی‌ داگیربكرێت، یان پێشێل بكرێت.

ئه‌وه‌ی‌ مایه‌ی‌ نه‌نگی‌ ونیگه‌رانیه‌، به‌رده‌وام له‌ هه‌رێمی‌ كوردستاندا هه‌وڵدراوه‌ ئه‌و ویسته‌ی‌ خه‌ڵك پشتگوێ‌ بخرێت، یان ته‌نانه‌ت سوك بكرێت، یان داگیر بكرێت، ئه‌نجامدانی‌ ساخته‌كاری‌ به‌رده‌وام له‌ هه‌ڵبژاردنه‌كاندا، داگیركردنێكی‌ ئاشكرای‌ ویستی‌ خه‌ڵكه‌. راوه‌ستان دژی‌ په‌رله‌مان و سوكایه‌تی‌ پێكردنی‌، له‌ كاتێكدا نایه‌وێ‌ ملكه‌چی‌ حه‌زو ئاره‌زوه‌یه‌ك  بێت، سوكایه‌تیكردنه‌ به‌ ویستی‌ خه‌ڵك.

هه‌ڵویست وه‌رگرتن له‌ دژی‌ یه‌كه‌م سه‌رۆكی‌ په‌رله‌مان و سه‌رنانه‌وه‌ی‌ به‌و خه‌مه‌وه‌، له‌به‌رئه‌وه‌ی‌ به‌یاننامه‌یه‌كی‌ دژی‌ شه‌ڕی‌ ناوخۆ ده‌ركرد و به‌دڵی‌ كه‌سێك نه‌بو، هه‌روه‌ها رێگریكردن له‌ دوا سه‌رۆكی‌ په‌رله‌مان و شه‌ڕپێفرۆشتنی‌، له‌ به‌رئه‌وه‌ی‌ پرۆژه‌ یاسایه‌كی‌ خسته‌ به‌رنامه‌ی‌ كاره‌وه‌ دور له‌ حه‌زو ئاره‌زوه‌كانی‌  كه‌سێك، ئه‌گه‌ر سوكایه‌تیكردن به‌ ویستی‌ خه‌ڵك نه‌بێ‌ چیه‌؟ 

من له‌ چه‌ند خاڵیكدا هه‌وڵده‌ده‌م، شیكارێكی‌ زانستی‌ بكه‌م سه‌باره‌ت به‌ دژایه‌تیكردنی‌ په‌رله‌مان:

یه‌كه‌م: كێ‌ دژایه‌تی‌ په‌رله‌مان ده‌كات؟ بۆ دژایه‌تی‌ په‌رله‌مان ده‌كرێت؟
له‌ هه‌مو وڵاتانی‌ جیهاندا خه‌ڵكی‌ جیاواز له‌ هه‌مو چین وتوێژو ئاسته‌ جیاوازه‌كان ده‌بنه‌ ئه‌ندامی‌ په‌رله‌مان، ئه‌مه‌ش جۆرێكه‌ له‌ به‌دیهێنانی‌ یه‌كسانی‌ له‌ نێوان هاوڵاتیاندا، كه‌ له‌ ده‌ستوری‌ زۆربه‌ی‌ زۆری‌ وڵاتاندا جه‌ختی‌ له‌ سه‌ر كراوه‌ته‌وه‌، به‌ڵام به‌داخه‌وه‌ ئه‌وه‌ی‌ له‌ كوردستاندا ده‌گوزه‌رێت، گروپێك له‌ ناو پارتی‌ دیموكراتی‌ كوردستاندا به‌ عه‌قڵیه‌تێكی‌ بارگاوی‌ به‌ دنیابینی‌ ده‌ره‌به‌گایه‌تی‌ وبه‌ گیانێكی‌ خۆ به‌زل زانین و پشت به‌ست به‌ وته‌ی‌: ( ئێمه‌ گروپی‌ هه‌ڵبژێردراوی‌ خواین )، به‌رده‌وام خۆیان به‌ گه‌وره‌و سه‌روه‌رو غه‌یری‌ خۆیان به‌ خزمه‌تكارو نۆكه‌ر زانیوه‌، ئه‌و تێڕوانینه‌ وایكردوه‌ كه‌مترین كه‌سی‌ په‌یوه‌ستی‌ خوێنی‌ به‌گروپه‌كه‌وه‌ له‌ په‌رله‌ماندا ئاماده‌ییان هه‌بێ‌، ئه‌م گروپه‌ به‌رده‌وام هه‌وڵیداوه‌ كۆی‌ دامه‌زراوه‌كان له‌ نێویشیاندا په‌رله‌مان له‌ ژێر رامو كۆنترۆلێ‌ خۆیدا بێ‌، وه‌ هیچ كات نه‌سڵه‌میوه‌ته‌وه‌، نه‌ درێغیشی‌ كردوه‌ له‌ دژایه‌تیكردنی‌ په‌رله‌مان له‌و كاتانه‌دا كه‌ په‌رله‌مان ملكه‌چی‌ حه‌زه‌كانی‌ نه‌بوه‌، به‌ڵام ئه‌وه‌ی‌ جێگه‌ی‌ تێڕامانه‌ له‌ لایه‌كو مایه‌ی‌ نیگه‌رانیه‌ له‌ لایه‌كی‌ تره‌وه‌، ئه‌وه‌یه‌ كه‌ رای‌ ئه‌م گروپه‌ بۆ دژایه‌تیكردنی‌ په‌رله‌مان بۆته‌ رای‌ فه‌رمی‌ پارتی‌ دیموكراتی‌ كوردستان، له‌ هه‌مان كاتدا چه‌ند كه‌سێكی‌ ئاست جیاوازی‌ كردۆته‌ ئه‌ندامی‌ په‌رله‌مان، تا دژایه‌تی‌ په‌رله‌مان بكه‌ن، به‌ڕای‌ من ره‌فتاری‌ ئه‌م كه‌سانه‌ جێگه‌ سه‌رسوڕمانه‌ وره‌فتاری‌ نه‌خۆشه‌، پێویسته‌ شیكاری‌ ولێكۆڵینه‌وه‌ی‌ ته‌واویان بۆ بكرێت بۆ دیاریكردنی‌ نه‌خۆشیه‌كه‌ وچاره‌سه‌ركردنی‌.

دووه‌م: كوێ‌ پێویسته‌ كارابكرێـته‌وه‌؟ په‌رله‌مان یان سه‌رۆكایه‌تی‌ هه‌رێم؟
زاراوه‌ی‌ كاراكردنه‌وه‌(Reactive)به‌كارده‌هێنرێت، بۆ چالاككردنه‌وه‌ی‌ به‌رنامه‌ یان سیستمێك یان دامه‌زراوه‌یه‌ك، دوای‌ ئه‌وه‌ی‌ ماوه‌ی‌ كاركردنی‌ كۆتایی‌ پێدێت و به‌سه‌رده‌چێت، به‌ڵام رێگریكردن به‌ هێز له‌وه‌ی‌ دامه‌زراوه‌یه‌ك كاری‌ خۆی‌ بكات، كاری‌ دامه‌زراوه‌كه‌ په‌كده‌خات، هه‌رچه‌ند دامه‌زراوه‌كه‌ له‌ روی‌ شه‌رعیه‌ت ویاسایبونه‌وه‌، ئاماده‌یه‌ كاری‌ خۆی‌ بكات، بۆیه‌ به‌لابردنی‌ ئه‌و رێگریه‌ ده‌وترێت ئاساییكردنه‌وه‌.

له‌ سۆنگه‌ی‌ ئه‌و راستیه‌وه‌، ئێستا ئه‌وه‌ی‌ پێویسته‌ كارابكرێته‌وه‌ سه‌رۆكایه‌تی‌ هه‌رێمه‌، ئه‌وه‌ش راسته‌وخۆ دوای ئاساییكردنه‌وه‌ی‌ دۆخی‌ په‌رله‌مان.

سێیه‌م: سه‌رۆكایه‌تی‌ هه‌رێم وه‌كو تاكه‌ سه‌رچاوه‌ی‌ كێشه‌كان
یه‌كێك له‌ هۆكاره‌ سه‌ره‌كیه‌كانی‌ دروستبونی‌ شه‌ڕی‌ ناوخۆ له‌ نێوان یه‌كێتی‌ وپارتیدا، په‌یوه‌ندی‌ به‌ هه‌ڵبژاردنی‌ رابه‌ری‌ بزوتنه‌وه‌ی‌ رزگاریخوازی‌ گه‌لی‌ كوردستانه‌وه‌ هه‌بو له‌و كاته‌دا، ئه‌وه‌بو له‌ گه‌ڕی‌ یه‌كه‌مدا كاك مسعود ومام جه‌لال زۆرترین ده‌نگیان به‌ده‌ستهێنا، به‌ڵام گه‌ڕی‌ دوه‌م ئه‌نجامنه‌درا بۆ دیاریكردنی‌ كه‌سێكیان به‌ رابه‌ر، ئیتر لێره‌وه‌ ناكۆكیه‌كان قوڵبونه‌وه‌، هه‌رچه‌ند هه‌وڵدرا كێشه‌كه‌ چاره‌سه‌ر بكرێت، له‌ رێگه‌ی‌ پێكهێنانی‌ ده‌سته‌یه‌كی‌ سه‌رۆكایه‌تیه‌وه‌، كه‌ به‌پێی‌ یاسای‌ ده‌سته‌ی‌ سه‌رۆكایه‌تی‌ هه‌رێمی‌ كوردستانی‌ عێراق ژماره‌ ( 19 ی‌ ساڵی‌ 1993 ) پێكده‌هات له‌و دوو پاڵێوراوه‌ی‌ زۆرترین ده‌نگیان به‌ده‌ستهێنابو، سه‌رۆكی‌ په‌رله‌مان، سه‌رۆكی‌ ئه‌نجومه‌نی‌ وه‌زیران، له‌ گه‌ڵ دوو ئه‌ندامی‌ مه‌كته‌بی‌ سیاسی هه‌ر یه‌ك له‌و دوو حیزبه‌ی‌ كه‌ دوو پاڵیوراوه‌كه‌ تێیدان، به‌ڵام ئه‌م ده‌سته‌یه‌ هه‌ر زو فه‌شه‌لی‌ هێنا، دواتر شه‌ڕی‌ ناوخۆ ده‌ستی‌ پێكرد، له‌ دوای‌ ساڵی‌ 2005 وده‌رچونی‌ یاسای‌ سه‌رۆكایه‌تی‌ هه‌رێم، له‌ پاڵ ئاشتبونه‌وه‌و به‌ ناوی‌ یه‌كڕیزی‌ نیشتمانی‌، پۆستی‌ سه‌رۆكی‌ هه‌رێم به‌كارهێنراوه‌ بۆ به‌هێزكردنی‌ پێگه‌ی‌ كه‌سی‌ یان بنه‌ماڵه‌، هه‌ر له‌ سه‌ره‌تاوه‌ هه‌ست به‌و مه‌ترسیه‌ كرابو، به‌ڵام له‌ ساڵی‌ 2009 به‌ ئاشكرا به‌ده‌ركه‌وت، له‌ ساڵی‌ 2013 بو به‌ هه‌ڕه‌شه‌یه‌كی‌ زۆر گه‌وره‌ له‌ سه‌ر یه‌كڕیزی‌ نیشتمانی‌ و پێكه‌وه‌ ژیان، به‌ كرداره‌كیش له‌ 2015 پۆستی‌ سه‌رۆكی‌ هه‌رێم یه‌كڕیزی‌ نیشتمانی‌ تێكداو، ئاسایشی‌ هه‌رێمی‌ كوردستانی‌ روبه‌روی‌ هه‌ڕه‌شه‌و مه‌ترسیه‌كی‌ زۆر گه‌وره‌ كرده‌وه‌، به‌ جۆرێك ئه‌گه‌ر حیكمه‌ت و دوربینی‌ وخه‌می‌ نیشتمان وئارامگری‌ سه‌ركردایه‌تی‌ سیاسی‌ بزوتنه‌وه‌ گۆڕان نه‌بوایه‌، جارێكی‌ تر شه‌ڕی‌ ناوخۆ هه‌ڵئه‌گیرسایه‌وه‌و له‌م سه‌رده‌می‌ دابه‌شكردنی‌ غه‌نیمه‌ی‌ داگیركه‌رانی‌ كوردستان، كوردستان جارێكی‌ تر خۆی‌ ده‌بوه‌وه‌ به‌غه‌نیمه‌و دابه‌شئه‌كرایه‌وه‌.

بۆیه‌ مانه‌وه‌ی‌ پۆستی‌ سه‌رۆكی‌ هه‌رێم به‌و شێوه‌یه‌ی‌ ئێستای‌ به‌ده‌سه‌ڵاتێكی‌ زۆرو دور له‌چاودێری وتاپۆكردنی‌ له‌ سه‌ر كه‌سێك یان بنه‌ماڵه‌یه‌ك، مه‌ترسیه‌كی‌ گه‌وره‌و هه‌ڕه‌شه‌یه‌كی‌ راسته‌قینه‌یه‌ له‌ سه‌ر ئاسایشی‌ كوردستان وهۆكارێكی‌ زۆر سه‌ره‌كیه‌ بۆ ئه‌وه‌ی‌ له‌ هه‌ر ئان وساتێكدا كوردستان بكات به‌ غه‌نیمه‌یه‌كی‌ چه‌ور بۆ ئه‌وانه‌ی‌ چاویان تێبڕیوه‌.


چواره‌م: به‌ سیستمكردن یان گۆڕینی‌ سیستم؟
به‌كارهێنانی‌ زاراوه‌ی‌ گۆڕینی‌ سیستم، به‌كارهێنانێكی‌ دروست نیه‌ وله‌هه‌مان كاتدا خزمه‌ت به‌و مه‌به‌سته‌ش ده‌كات كه‌ پارتی‌ ده‌یه‌وێت، چونكه‌ پارتی‌ ده‌ڵێت، گۆڕان ولایه‌نه‌كانی‌ تر ده‌یانه‌وێت سیستم بگۆڕن، گۆڕینی‌ سیستمیش ئه‌بێ‌ به‌ رێكه‌وتن وسازانی‌ نیشتمانی‌ بێت، وه‌ خۆشی‌ هیچ پرۆژه‌یه‌كی‌ نیه‌و به‌هیچ پرۆژه‌یه‌كیش رازی‌ نیه‌، كه‌واته‌ ئه‌وه‌ی‌ هه‌یه‌ نابێ‌ ده‌ستكاری‌ بكرێت، به‌مه‌ش ده‌یه‌وێت ویستی‌ خۆی‌ به‌سه‌ر هه‌مواندا بسه‌پێنێ‌. 

به‌ڵام له‌ راستیدا ئه‌وه‌ی‌ داوا ده‌كرێت به‌ سیستمكردنه‌، نه‌ك گۆڕینی‌ سیستم، چونكه‌ هه‌ڵبژاردنی‌ سه‌رۆكی‌ هه‌رێم، جارێك له‌ په‌رله‌مانه‌وه‌ بوه‌، جارێك له‌لایه‌ن خه‌ڵكه‌وه‌، جارێكی‌ تر له‌ په‌رله‌مانه‌وه‌ بۆ دوو ساڵ درێژكرایه‌وه‌، بۆ كۆتا جاریش په‌نا برایه‌ به‌ر ئه‌نجومه‌نی‌ شورا بۆ درێژكردنه‌وه‌ی‌، سه‌ره‌ڕای‌ تێبینی‌ زۆر له‌ سه‌ر یاسایبونی‌ درێژكردنه‌وه‌ی‌ یه‌كه‌م، نایاسایبونی‌ ئاشكراو راشكاوی‌ درێژكردنه‌وه‌ی‌ دووه‌م، ئه‌وه‌ی‌ ده‌مه‌وێت بیڵێم، ئه‌م ناسه‌قامگیری‌ و جیگۆركێ‌ به‌رده‌وامه‌ی‌ سه‌رچاوه‌ی‌ شه‌رعیه‌تی‌ پۆستی‌ سه‌رۆكی‌ هه‌رێم سیفه‌تی‌ سیستمبون نا به‌خشێ‌ به‌و پۆسته‌. بۆیه‌ نابێت پارتی‌ ئه‌م پۆسته‌ به‌ موڵكی‌ خۆی‌ بزانێت وبیخاته‌ ده‌ره‌وه‌ی‌ رێكه‌وتن وسازانی‌ نیشتمانی‌، یان نابێت ئه‌و تێڕوانینه‌ بسه‌پێنێ‌ كه‌ پێشتر ئه‌م پۆسته‌ رێكه‌وتن وسازانی‌ نیشتمانی‌ له‌ سه‌ر كراوه‌، ئێستاش پێویسته‌ له‌سه‌ر هه‌مان ریتم به‌رده‌وام بین. شێوه‌ی‌ هه‌ڵبژاردنی‌ سه‌رۆكی‌ هه‌رێم به‌و جۆره‌ ناسه‌قامگیره‌ی‌ كه‌ ئاماژه‌مان پێكرد، هه‌روه‌ها ده‌سه‌ڵاته‌ زۆر وزه‌وه‌نده‌كانی‌ ره‌نگه‌ له‌ چه‌ند ساڵی‌ رابردودا رازیبونی‌ به‌شێك له‌ سه‌ركردایه‌تی‌ یه‌كێتی‌ نیشتمانی‌ له‌ سه‌ر بوبێ‌، به‌ڵام ئه‌وه‌ مانای‌ رێكه‌وتن وسازانی‌ نیشتمانی‌ نیه‌ له‌ سه‌ری‌، له‌به‌رئه‌وه‌ پێویسته‌ پارتی‌ له‌وه‌ تێبگات، ئێستا كاتێكی‌ گونجاوه‌، بۆ ئه‌وه‌ی‌ شێوه‌ی‌ هه‌ڵبژاردنی‌ سه‌رۆكی‌ هه‌رێم وماوه‌و ده‌سه‌ڵاته‌كانی‌ به‌ سیستم بكرێت، له‌ رێگه‌ی‌ رێكه‌وتن وسازانی‌ نیشتمانیه‌وه‌، نه‌ك ئه‌وه‌ی‌ ویستی‌ خۆی‌ بسه‌پێنێ‌ ویه‌كڕیزی‌ نیشتمانی‌ تێكبدات.


پێنجه‌م: میتۆدی‌ پێغه‌مبه‌ران بۆ گۆڕانكاری‌
پێغه‌مبه‌ران زۆر راشكاو بون له‌ روبه‌ڕوبونه‌وه‌ی‌ ده‌سه‌ڵاتداران، بێ‌ هیچ ترس وشه‌رمێك به‌ ئاشكرا بانگه‌شه‌ی‌ گۆڕینی‌ ئه‌و واقیعه‌یان كردوه‌ كه‌ له‌ پێناو گۆرینیدا نێردراون، ئه‌م میتۆده‌ به‌ ئاشكرا له‌ بانگه‌وازی‌ ئیبراهیم وموسا وموحه‌مه‌دا ( د.خ ) به‌ده‌رده‌كه‌وێت. به‌ڵام ئه‌وه‌ی‌ جێگه‌ی‌ سه‌رنجه‌ هه‌ندێك كه‌س یان هه‌ندێك لایه‌نی‌ سیاسی‌، هه‌رچه‌نده‌ خۆیان وانیشانده‌ده‌ن كه‌ گوتاری‌ ئاینیان میتۆدی‌ پێغه‌مبه‌رانه‌، وبه‌رده‌وامیش ئه‌و میتۆده‌ بۆ هه‌واداران و خه‌ڵكانی‌ تریش رونده‌كه‌نه‌وه‌و بانگه‌شه‌ی‌ پابه‌ند بون ده‌كه‌ن پێوه‌ی‌، به‌ڵام كاتێك كار دێته‌ سه‌ر ئه‌وه‌ی‌ له‌ واقعی‌ خۆیاندا جێبه‌جێی‌ بكه‌ن، بیانوی‌ جۆراو جۆر ده‌دۆزنه‌وه‌، بۆ ئه‌وه‌ی‌ قه‌ناعه‌ت به‌ خۆیان بكه‌ن، بۆ هه‌ڵویستێك ره‌نگه‌ له‌ بنچینه‌دا قه‌ناعه‌تیان پێی‌ نه‌بێ‌، هه‌ڵوێستێكی‌ وه‌های‌ دژ به‌ میتۆدی‌ پێغه‌مبه‌ران، لای‌ هه‌ندێك گومان له‌ سه‌ر خودی‌ میتۆده‌كه‌ دروستده‌كات، لای‌ هه‌ندێكی‌ تر گومان ته‌نها له‌ سه‌ر كه‌سه‌كه‌ دروستده‌كات، ره‌نگه‌ به‌ بێهه‌ڵوێست وێنا بكرێت، له‌ پاڵ ئه‌و گومانانه‌دا ره‌نگه‌ كومه‌ڵێكی‌ تر گومانیان له‌ سه‌ر گوتاری‌ سیاسی‌ لایه‌نه‌كه‌  لا دروست بێت، ئه‌م گومانانه‌ش به‌ رای‌ من ته‌واو ره‌واو له‌ جێی‌ خۆیاندان.


شه‌شه‌م: شۆڕشگێڕی‌ دوێنێ‌ وعه‌ڕابی‌ ئه‌مڕۆ 
هه‌ندێك له‌ شۆڕشگێڕانی‌ دوێنێ‌ كه‌ به‌رده‌وام خه‌بات وشاخ به‌ خه‌ڵك ده‌فرۆشنه‌وه‌، وه‌ له‌راستیدا جێگه‌ی‌ رێز وپاداشتن، به‌ڵام به‌داخه‌وه‌ ئێستا بون به‌ عه‌ڕابـی‌ ئه‌وانه‌ی‌ دژایه‌تی‌ په‌رله‌مان ده‌كه‌ن، ئه‌م عه‌ڕابیه‌ش پرسیاری‌ زۆر دروستده‌كات له‌ سه‌ر خه‌باتی‌ دوێنێیان، ره‌نگه‌ ئه‌و پرسیارانه‌ش بگه‌نه‌ ئاستی‌ گومان، چونكه‌ ئه‌و داكۆكیه‌ی‌ ئه‌مان له‌ دژه‌كانی‌ په‌رله‌مانی‌ ده‌كه‌ن، مرۆڤــ ده‌خاته‌ سه‌ر ئه‌وه‌ی‌ پرسیار بكات، ئایا ئه‌و كاره‌ی‌ ئه‌مان ده‌یكه‌ن، فاكته‌ره‌كه‌ی‌ ترسه‌؟ یان به‌ده‌ستهێنانی‌ به‌رژه‌وه‌ندیه‌؟ یاخود قه‌ناعه‌ته‌؟ هه‌ریه‌كێك بێت له‌م سێ‌ هۆكاره‌ جێگه‌ی‌ خۆیه‌تی‌ گومانیان لێبكه‌ین، چونكه‌ ئه‌و خه‌باته‌ی‌ ئه‌وان بانگه‌شه‌ی‌ پێوه‌ ئه‌كه‌ن مومكین نیه‌ له‌ گه‌ڵ ترس وبه‌رژه‌وه‌ندیدا یه‌كبگرێته‌وه‌، خۆ ئه‌گه‌ر قه‌ناعه‌تیشیان وایه‌ كه‌ پێویسته‌ یه‌ك كه‌س یان یه‌ك بنه‌ماڵه‌ فه‌رمانڕه‌وا بێت، وه‌ كوردستانیش شامی‌ شه‌ریفه‌ وهیچ نادادیه‌كی‌ تێدا نیه‌، ئه‌وا پێویسته‌ پێداچونه‌وه‌یه‌كی‌ ته‌واو به‌و ئامانجانه‌دا بكرێت كه‌ دوێنێ‌ له‌ پێناویدا خه‌باتیان كردوه‌، وه‌ به‌ ئاشكرا دان به‌وه‌دا بنرێت، ئامانجی‌ شاراوه‌ی‌ ئه‌مڕۆیان جیاوازه‌ له‌ ئامانجی‌ جاڕدراوی‌ دوێنێیان، یان راستر بوترێت، خه‌باتی‌ دوێنێیان بۆ ئامانجی‌ شاراوه‌ی‌ ئه‌مڕۆ بوه‌، نه‌ك ئامانجی‌ جاڕدراوی‌ دوێنێ‌. 


خوێندراوەتەوە735