تاڤگە سابیر

ریفۆڕم بە فکری نا سیاسی ناکرێت‌

ناکرێت ریفۆڕ م بە چەند دزێك بکرێت  و پێیانبڵێین " ئەوە کلیلەکە"، دوایش، کە کوردستانیان تاڵانکرد سەرسامیبن، چونکە ئەوان لە ڕابووردوودا ئەوەیان نەشاردۆتەوە، کە هەر ئەو کارەنە دەزانن دەتوانیت کوردستان بەتاڵانببه‌ن و سەروەت و سامانی ئەو وڵاته‌ به‌هه‌ده‌ر بده‌ن، کە پێشتر بە هەزاران شێواز سەلماندویانە، کە دروستکەرنین  و شارەزای حوکمکردنین، خاوەنی دیدو دنیابینیەکی مەدەنی و عەقڵانی نین.

ناكرێ به‌و جۆره‌ سیاسیانه‌ بڵێن ئەوە کوردستانە و حوکم بکە و دواجار کە شکست ده‌هێنن لە بەڕێوەبردن و  دابیکردنی پێداویستییە هەرە سەرەتاییەکاندا خه‌ڵكدا و له‌بری ئه‌وه‌ش سەرکەوتوو ئه‌بن لە فەسادو تاڵانکردنی سەروەت و سامانی کوردستاندا.

خه‌ڵكی خه‌مخۆر و راستگۆ و به‌ ویژدان ناتوانێ بڵێت " هیچ لێپرسراونین" یان بەلانیکەمەوە ناتوانێن بڵێت " ئێمە بەشداری ئەو شکەستەمان نەکردووە"، له‌و كاته‌دا پارتی و یەکێتی بەپلەی یەکەم لێپرسراون لەم هەلومەرج و بارودۆخە خۆ ئەگەر بەمانا سادەکەی دیموکراسیەتیش بێت، دەبێت پارتی و یەکێتی خۆیان بەلێپرسراو بزانن دەربارەی واقیعی " ما هو موجود " ، کە واقیعێکە باس لە ناعەدالەتی و فەسادو تۆقاندن و هەرەسهێنانی هەموو ماناو پرنسیپەکان دەکات و جۆری حوکمیش باس لە حوکمکرنێکی شکستیانهێناوە لە بەرهەمهێنانی هێزی سیاسی و کۆمەڵایەتییەکان.

ناسینەوەو پۆلێنکردنی هێزەکان خۆی زانستەو شارەزایی پێویستەو هەرگیز بابەتی " ڕا " ی من و " ڕای" تۆ نییە ، بەڵام ئێمە ئاگاییەکمان لەم زانستە نییە. هەروەك چۆن سەرکرایەتی پارتی و یەکێتی چەندین ساڵە سەرقاڵی کوشتنی سیاسەتن، کە گشت کێشە سیاسەکان و مەدەنییەکان و کۆمەڵایەتییەکان لەفەزای گشتیەوە دەگوێرێتەوە بۆ دانیشتنە تایبەتییەکانیان لە سەری ڕەش یان قەڵاچوالان، دوو شوێنی نا سیاسی و بە دوو لەشەفافیەتی مەدەنی و سیاسی، واتە هەوڵی بە عەشایەرکردنەوەی سیاسەت، سەرقاڵی تیرۆرکردنی سیاسەتن لەوە کەپێشوەخت و بێسازدانی گفتوگۆیەکی عەقڵی و بێ دبەیتێکی مەدەنییانە لەسەر کێشەکان ئەوان بڕیاریانداوە.
لەبنەڕەتدا عەقڵ پێماندەڵێت لە هەلومەرجێکی تەندوستداو لەفەزایەکی مەدەنی و سیاسیدا ئەم هێزە، لەسەر جۆرێك لەبازرگانی دەژین کەلەم دەڤەرەدا پێیدەڵێن "سیاسەتی" لەپاڵ دوو کۆمپانیادا، دوو کۆبوونەوەی  نا سیاسی و نا مەدەنیدا.

لەدیدی منەوە هەموولایەك، هەموو دەستەوتاقمێك، دامودەزگایەك، رێکخراوێك، بەشێکی لێپرسراوێتی ئەو هەلومەرجەی دەکەوێتە سەرشان، هەموومان کەم تا زۆر لەم ستەمکارییە بەرپرسیارین لە ماوەی ٢٦ ساڵی ڕابردوودا پێچەوانەی کۆمەڵێك نووسەرو " ڕۆشنبیر"و  شاعیر" ، کە هەر زۆر زوو مەفتونی " دەسەڵاتی سیاسەتمەدارەکان " بوون و بازیانهەڵدایە ناو هاوپەیمانێتیەکەوە لەگەڵیان و بوونە بەشکی دانەبڕاو لەو هەلومەرجە تازایەی کوردستان، ئێمە چەند نووسەرێك و لێکۆڵەرەوەیەك بووین، کە لەوماوەیەدا هەوڵمانداوە خوێندنەوەی دیکەمان بۆ " سیاسەت" و ' کەلتووری کوردی" و ئەو هەلومەرجە هەبێت لە ڕێگای بەرهێنانی دامودەزگای چەمکی تازەوەو ، تا ئەو شوێنەی کە توانای عەقلی و فیکریمان ڕێگەی پێداوین و لە هەستکردنمانەوە بە لێپرسراوێتی و وەك ئەرکی فیکری و هاونیشتمانییانەی خۆمان و وەك کەسانی لێپرسراو بەرانبەر بەویژدانی خۆمان و بگرە زیادەڕۆیی نییە گەربڵێن وەك ویژدانێکی زیندوو لە قۆناغێکی پڕ لەقەیراناوی بێویژدانیدا و سەرقاڵی هۆشیارکردنەوەی خەڵکی بووین ، کە ڕۆژگارێك ناومانناو " دەستەڵات".
هاتووین ناومان لە شتێك ناوە " دەسەڵات" ، کە هەموو شتێکە جگە لە دەسەڵات، بەکۆبوونەوەی چەند گروپێك لەسەر خوانی فەرهودکردنی سامانی وڵات و ئاودیوکردنی ژێرخانی ئابووری و خاپورکردنی و دژایەتیکردنی بەرژەوەندی گشتی و فەزای گشتی و سوکایەتیکردن بە مرۆڤ و ژیانی و پرنسیپە پیرۆزو مەدەنییەکانمان.


خوێندراوەتەوە277