ره‌نجده‌ر عوسمان

نوخبه‌ی‌ سیاسی‌ ده‌سه‌ڵاتدار له‌كوردستان‌


ڕه‌نگه‌ یه‌كێك له‌ كێشه‌ گه‌وره‌كانی‌ ڕه‌خنه‌گرتنی‌ ئێمه‌ له‌ كایه‌ی سیاسی‌ یان ڕاستر بڵێم له‌ ده‌سه‌ڵاتی‌ سیاسی‌ كوردی‌ (یه‌كێتی‌ و پارتی‌), سه‌تحی‌ بوون و ڕووكه‌شگه‌راییه‌كه‌ی‌ بێت, شۆڕنه‌بونه‌وه‌ی‌ ڕه‌خنه‌ بێت بۆ دوا پنت و نه‌بینین و قسه‌ نه‌كردن بێت له‌سه‌ر ماهیه‌ت و جه‌وهه‌ری‌ ئه‌م ده‌سه‌ڵاته‌ سیاسیه‌,یاخود نه‌گه‌یاندنی‌ ڕه‌خنه‌ بۆ سه‌ر پلێته‌ ئه‌سڵیه‌كه‌ی‌ ئه‌م ده‌سه‌ڵاته‌ی‌  كه‌ ئه‌مڕۆ بوونی‌ هه‌یه‌ و حوكم ده‌كات.

به‌و مانایه‌ی‌ هه‌میشه‌ ڕه‌خنه‌كان هاوكات بوون له‌گه‌ڵ ده‌ره‌نجامی‌ كێشه‌و گرفتێكی‌ ئانی‌,ده‌ست و په‌نجه‌ نه‌رمكردنن له‌گه‌ڵ ئه‌و ڕووداو و  پێشهاتانه‌ی‌ كه‌ له‌ ڕۆژه‌ڤدان,واتا بچووكردنه‌وه‌ی‌ ڕه‌خنه‌ بۆ كۆمه‌لێك بابه‌ت و شتی‌ ڕۆژانه‌ ,به‌و پێیه‌ی‌ سیاسه‌ت له‌ وڵاتی‌ ئێمه‌دا زیاتر ڕه‌هه‌ندێكی‌ تاكتیكی‌ و ڕۆژانه‌ی‌ هه‌یه‌و شتێك به‌ ناوی‌ ستراتیژ و بیركردنه‌وه‌ له‌ چاكه‌ی‌ گشتی‌ بوونی‌ نی‌ یه‌ ,هه‌ر بۆیه‌ ڕه‌خنه‌گرتنیش هه‌ر له‌م ئاسته‌دا ده‌رده‌كه‌وێت.

به‌مانایه‌كی‌ تر,ڕه‌خنه‌ له‌ سیاسه‌ت و سوڵته‌ی‌ سیاسی‌ و كاره‌كته‌ره‌كانی‌ ناوی‌ له‌م هه‌رێمه‌دا له‌سه‌ر له‌ یادكردنێكی‌ گه‌وره‌ی‌ كۆی‌ ئه‌و مێژوو و كاره‌ساتانه‌ ده‌ژیت كه‌ هه‌مان ئه‌قڵیه‌تی‌ سیاسی‌ و كاره‌كته‌ری‌ سیاسی‌ به‌رهه‌می‌ هێناوه‌.

هه‌ر بۆیه‌ سه‌رهه‌ڵدان و دروستكردنی‌ هه‌ر قه‌یرانێك له‌لایه‌ن ئه‌و ده‌سه‌ڵاته‌ سیاسیه‌وه‌ یه‌كسانه‌ به‌ فه‌زحكردن و له‌ یادچوونه‌وه‌ی‌ قه‌یران و كاره‌ساتێكی‌ تر كه‌ له‌ پێشوودا و له‌لایه‌ن خودی‌ ئه‌و نوخبه‌یه‌وه‌ به‌رهه‌م هێنراوه‌.

لێره‌وه‌ خودی‌ ڕه‌خنه‌ له‌ ده‌سه‌ڵاتی‌ سیاسی‌ ده‌بێت به‌ شتێكی‌ كاتی‌ و زوو تێپه‌ڕ و خودی‌ ده‌سه‌ڵاتیش هیچ باكی‌ پێی‌ نیه‌,بگره‌ له‌ زۆر حاڵه‌تدا خودی‌ ڕه‌خنه‌ ده‌بێـته‌وه‌ به‌ داینه‌مۆی‌ درێژه‌دان به‌و شێوازه‌ له‌ حوكم كه‌ ساڵه‌هایه‌ درێژه‌ی‌ پێده‌درێت و به‌رده‌وامه‌.

لێره‌وه‌ ده‌مه‌وێت بڵێم به‌بێ‌ ده‌ست بردن و ڕه‌خنه‌ گرتن له‌ كۆی‌ ئه‌و ستراكتۆره‌ی‌ كه‌ بیركردنه‌وه‌ی‌ ئه‌و نوخبه‌ سیاسیه‌ی‌ كه‌ حوكمڕانی‌ ئه‌م وڵاته‌ ده‌كات و له‌ ئێستادا ته‌واوی‌ جومگه‌ ئه‌ساسیه‌كانی‌ ژیانیان له‌م هه‌رێمه‌ داگیركردوه‌,ناتوانین ڕێگه‌ خۆش بكه‌ین بۆ بیركردنه‌وه‌ له‌ هه‌ر گۆڕانكاریه‌كی‌ ڕیشه‌یی و جوڵه‌یه‌كی‌ ڕادیكاڵ.

به‌هۆی‌ ئه‌وه‌ی‌ ئێمه‌ خاوه‌نی‌ یه‌ك مێژووین,لانی‌ كه‌م یه‌ك مێژووی‌ سیاسی‌ ,مێژوویه‌ك حه‌فتا ساڵه‌ له‌سه‌ر یه‌ك ڕاسته‌هێڵ ده‌ڕوات و له‌ كۆمه‌ڵێك كاره‌كته‌ر پێكدێن كه‌ یه‌ك ئه‌قڵیه‌ت و مۆراڵی‌ سیاسی‌ ده‌یانجوڵێنێت,مێژوویه‌ك حه‌فتا ساڵه‌ و بۆ ئه‌مڕۆ درێژ بۆته‌وه‌ و گه‌ر وابڕوات ئاینده‌شی‌ له‌به‌رده‌ست دایه‌ ,به‌بێ‌ ئه‌وه‌ی‌ ئه‌م مێژووه‌تووشی‌ هیچ دابڕان و قه‌تیعه‌یه‌ك بووبێت.

له‌ كاتێكدا زه‌مه‌ن و دنیا هه‌مووی‌ گۆڕاوه‌,تاكتیك و كه‌ره‌سته‌كانی‌ سیاسه‌تكردن گۆڕاون ,گۆڕانێكی‌ زۆر به‌سه‌ر ئه‌قڵیه‌تی‌ ململانێی‌ سیاسی‌ و ئیداره‌دانی‌ كۆمه‌ڵگاكاندا هاتوه‌ ,ئه‌مڕۆ به‌ هۆی‌ جیهانگیری‌ و كرانه‌وه‌ی‌ دنیا و تێكه‌ڵ بوون و كارله‌یه‌ككردنی‌ كلتووره‌كان له‌سه‌ر یه‌كتر, جیهان پێشكه‌وتنێكی‌ به‌رچاوی‌ به‌ خۆیه‌وه‌ بینیوه‌.

به‌ڵام ئه‌و نوخبه‌ سیاسیه‌ی‌ حكومڕانی‌ ئه‌م هه‌رێمه‌ ده‌كات به‌بێ‌ هیچ دابڕانێك له‌م مێژووه‌ ,ئه‌م ئه‌قڵیه‌ته‌ دۆناو دۆن پێده‌كات,جگه‌ له‌وه‌ی‌ تادێت دڕتر و فاشیتر ده‌بێت و ته‌ماحه‌كانی‌ له‌ تاڵانكردن و فه‌رهودكردنی‌ ژێرخان و سه‌رخان گه‌وره‌تر ده‌بێت ,ئه‌وه‌ی‌ له‌ ئێستاشدا به‌ زه‌قی‌ هه‌ستی‌ پێده‌كرێت كوڕ و كوڕه‌زاكانی‌ ئه‌م نوخبه‌ سیاسیه‌  به‌ هه‌مان ئه‌قڵیه‌ت و مۆراڵی‌ باوانیان خۆیان ئاماده‌كردوه‌ بۆ حكومڕانیكردنی‌ سبه‌ینێی‌ ئێمه‌ ,كه‌ بێگومان له‌سه‌ر ده‌ستی‌ ئه‌وان تاریك تر و دڵڕه‌قتر ده‌بێت.

هه‌ر بۆیه‌ پێویسته‌ ته‌واوی‌ ئه‌و مێژووه‌ وه‌ك یه‌ك جه‌سته‌ و یه‌ك ماشێنی‌ گه‌وره‌ ببینین,كه‌به‌سه‌ر یه‌كه‌وه‌ به‌رپرسه‌ له‌وه‌ی‌ ئێمه‌ له‌ ئێستادا چۆن حوكم ده‌كرێین و چیمان به‌سه‌ر هاتووه‌ و بۆ كۆمه‌ڵگای‌ ئێمه‌ گه‌یشتووه‌ به‌م دۆخه‌ی‌ ئێستا,هه‌ڵبه‌ت ئه‌مه‌ش به‌بی‌ َده‌ستكاریكردنی‌ زیهنیه‌ت و ئه‌قڵیه‌تی‌ بیركردنه‌وه‌ و ڕه‌خنه‌گرتنمان مه‌یسه‌ر نابێت ,تا لێیه‌وه‌ ئاسانتر و باشتر بزانین بۆ ئێمه‌ گه‌یشتووین به‌م ڕۆژه‌ ڕه‌شه‌ی‌ ئێستا, به‌هۆی‌ كۆمه‌ڵێك مافیاو خه‌ڵكانی‌ فاشیه‌وه‌,لێره‌وه‌ به‌ پێویستی‌ ده‌زانم چه‌ند خاڵێك باس بكه‌م, كه‌ به‌ بڕوای‌ من پێویستی‌ به‌ پێداچوونه‌وه‌ و سه‌ر له‌ نوێ‌ بینا كردنه‌وه‌ی‌ هه‌یه‌:

1.گرفتی‌ ئه‌ساسی‌ و بنه‌ڕه‌تی‌ له‌ تێگه‌یشتنی‌ ئێمه‌ بۆ نوخبه‌ی‌ سیاسی‌ كوردی‌, به‌تایبه‌ت ئه‌و چه‌ند كه‌سه‌ی‌ كه‌ مۆنۆپۆڵی‌ هه‌موو شتێكیان كردوه‌ و حكومڕانی‌ پله‌ یه‌كی‌ ئه‌م وڵاته‌ن ئه‌وه‌یه‌ ,كه‌ پێمان وایه‌ ئه‌وانه‌ كۆمه‌ڵه‌ خه‌ڵكانێكی‌ نه‌زیه و پاك و دڵسۆز بوون بۆ نیشتیمان و گه‌له‌كه‌یان و ئه‌وان شه‌ڕی‌ سه‌ندنه‌وه‌ی‌ ماف و ئازادیان كردوه‌ و له‌و پێناوه‌دا ساڵانێكی‌ زۆر له‌م چیایانه‌ دژ به‌ داگیر كه‌ران جه‌نگاون، به‌ڵام دوای‌ ڕاپه‌ڕین و له‌ میانه‌ی‌ پڕۆسه‌ی‌ ئاوێزان بوونیان له‌گه‌ڵ ده‌سه‌ڵات و حكومڕانیدا و له‌و ده‌مه‌ی‌ ده‌بن به‌ حاكم, ده‌بن به‌ خه‌ڵكانی‌ فاسد و گه‌نده‌ڵ و مافیا ئاسا ڕه‌فتار ده‌كه‌ن ,واتا ئه‌م ته‌سه‌وراته‌ پێمان ده‌ڵێت ئه‌م سیاسیانه‌ له‌ سه‌ره‌تاوه‌ خه‌ڵكانی‌ باش بوون، به‌ڵام ده‌سه‌ڵات و پۆست و پاره‌ كردنی‌ به‌م جۆره‌ مه‌خلوقه‌ی‌ ئێستا,هه‌ر بۆیه‌ هه‌میشه‌ ئێمه‌ چاومان له‌ باش بوونیانه‌و پێمان وایه‌ ئه‌م كۆبونه‌وه‌ نا كۆبونه‌وه‌یه‌كی‌ تر ,ئه‌م كابینه‌ی‌ وه‌زاری‌ نا كابینه‌یه‌كی‌ تر ,ئه‌م ساڵ نا ساڵێكی‌ تر ئه‌مانه‌ واز له‌م هه‌موو تاڵانی‌ و چه‌ته‌ییه‌ دێنن و ده‌بنه‌وه‌ به‌ نیشتیمان په‌روه‌ره‌كه‌ی‌ جاران.

هه‌ڵه‌ی‌ سه‌ره‌كی‌ ئه‌م تێڕوانینه‌ ڕێك لێره‌دایه‌, له‌ ڕاستیدا به‌بێ‌ ده‌ستكاری‌ كردنی‌ ئه‌م تێگه‌یشتنه‌و به‌بێ‌ داننه‌نان به‌وه‌ی‌ ئه‌م جۆره‌ دنیا بینیه‌ هه‌ڵه‌یه‌كی‌ گه‌وره‌ بوه‌ و تا  ئێستا هاتوه‌ ,ناتوانین و ناكرێت بیرله‌ هیچ جۆره‌ چاره‌سه‌رێك بكه‌ینه‌وه‌.


هه‌ربۆیه‌ كه‌ ده‌ڵێم ئه‌م مێژووه‌ یه‌كێكه‌و له‌سه‌ر یه‌ك هێڵ ڕۆیشتوه‌ و درێژ بۆته‌وه‌ تا ئێستا,مه‌به‌ستم لێی‌ بردنه‌وه‌ی‌ دیدی‌ ڕه‌خنه‌گریمانه‌ بۆ سه‌ره‌تاكانی‌ دروستبوونی‌ ئه‌وئه‌قڵیه‌ته‌ی‌ ئه‌مڕۆی‌ به‌رهه‌م هێناوه‌.

گه‌ر ورد بینه‌وه‌ و دیقه‌ت له‌م مێژووه‌ بگرین وێستگه‌یه‌كی‌ تیادا نابینیته‌وه‌ پڕ نه‌بێت له‌ بێ‌ ڕێزیكردن به‌ مرۆڤی‌ كوردی‌ ,له‌ خیانه‌ت ,ده‌ست پیسی‌ و داوێن پیسی‌ ,له‌ شه‌ڕی‌ براكوژی‌,ئه‌مانه‌ ته‌نانه‌ت له‌و جێگایانه‌ی‌ حیزبێك له‌ هه‌ناوی‌ حیزبێكی‌ تردا له‌ دایك ده‌بێت به‌ درێژایی ئه‌و مێژووه‌ ,هه‌مان مۆڕاڵ  و خه‌ون و خولیای‌ حیزبی‌ دایك و ئه‌وه‌ی‌ پێش خۆی‌ له‌ خه‌یاڵدایه‌ به‌ جیاوازیه‌كی‌ كه‌م له‌جوزئیاتدا,سه‌ره‌نجام هه‌مان ڕێچكه‌ ده‌گرێته‌وه‌ به‌ر كه‌ ئه‌ویدی‌ پێیدا ڕۆیشتوه‌.

به‌كورتی‌ و به‌ پوختی‌ ئه‌وه‌ی‌ له‌ سیاقی‌ ئه‌و مێژووه‌دا ده‌یبینین,ته‌ئكید كردنه‌وه‌یه‌ له‌سه‌ر یه‌ك خاڵ, ئه‌ویش ئه‌قڵیه‌ت و مه‌نتاڵیته‌یتی‌ ئه‌م نوخبه‌یه‌یه‌ كه‌  له‌سه‌ر یه‌ك پره‌نسیپ به‌نده‌ ئه‌ویش (قوربانیدانی‌ میلله‌تێك له‌ پێناو گه‌یشتن به‌و خه‌ون و ئاواته‌ شه‌خسی‌ و تایبه‌تانه‌ی‌ خۆیان و نه‌وه‌ و بنه‌ماڵه‌ سیاسیه‌كانیان)ده‌یانه‌وێت.

2.لێدان له‌ شه‌رعیه‌تی‌ شۆڕشگێڕی‌,بیرمان نه‌چێت به‌شی‌ زۆری‌ هۆكاری‌ مانه‌وه‌ی‌ ئه‌م نه‌وه‌یه‌ی‌ حوكمڕانی‌ ئه‌م وڵاته‌ ده‌كات... شه‌رعیه‌ت له‌م خه‌باته‌ وه‌رده‌گرن.

درۆی‌ هه‌ڵبژاردن و بوونی‌ حكومه‌ت و په‌رله‌مان ته‌نها بۆ فریودانی‌ خه‌ڵكییه‌ ,هه‌ر كه‌سێكی‌ به‌ ئاگا له‌م وڵاته‌دا بگریت تێده‌گات له‌وه‌ی‌ كه‌ له‌ ماوه‌ی‌ ئه‌م بیست و شه‌ش ساڵه‌ی‌ ڕابردوودا شتێكمان به‌و ناوانه‌وه‌ نه‌بوه‌ لانی‌ كه‌م به‌ فعلی‌ خاوه‌نی‌ ئه‌م دامه‌زراوانه‌ نه‌بووین كه‌ خاوه‌نی‌ بڕیارو قسه‌ی‌ خۆیان بن,هه‌موومان ده‌زانین ده‌سه‌ڵاتی‌ فعلی‌ و كاریگه‌ر و یه‌كلاكه‌ره‌وه‌ له‌ شوێنی‌ تر ولای‌ خه‌ڵكی‌ تر بوون.

هه‌ر بۆیه‌ ئه‌م نوخبه‌ سیاسی یه‌ ,هه‌رگیز باوه‌ڕی‌ به‌ نیزامی‌ دیموكراسی‌ و موئه‌سه‌سه‌ی‌ حكومی‌ و په‌رله‌مانی‌ نه‌بوه‌ ,له‌له‌حزه‌یه‌كیشدا گه‌ر هه‌ستیان كردبێت ده‌زگایه‌ك له‌ دروست بووندایه‌ و خه‌ریكه‌ ڕۆڵی‌ خۆی‌ ده‌گێڕێت ,له‌ كه‌داریان كردوه‌ و په‌كیان خستوه‌.

بۆ نمونه‌,داخستنی‌ په‌رله‌مان و سوكایه‌تی‌ پێكردنی‌ له‌لایه‌ن پارتی‌ یه‌ و ,نیشانه‌یه‌كی‌ دیاره‌ به‌وه‌ی‌ كه‌ ئێمه‌ شتێكمان نه‌بوه‌ ناوی‌ په‌رله‌مان بێت ,ته‌نها ئه‌و كاته‌ نه‌بێت كه‌داده‌خرێت.

واتا ئه‌وكاته‌ی‌ په‌رله‌مان دروست ده‌بێت هه‌ر ئه‌و كاته‌ ده‌رگاكه‌ی‌ داده‌خرێت , له‌ پێشووتردا شتێكمان به‌و ناوه‌وه‌ نه‌بوه‌ جگه‌ له‌ چه‌ند هه‌وڵێكی‌ ئۆپۆزسیۆن نه‌بێت له‌ پێشووتردا كه‌ به‌ ئاكام نه‌گه‌یشت.

بۆیه‌ ته‌نانه‌ت به‌ دوور نازانرێت به‌یانی‌ یه‌كێك له‌ بكه‌رانی‌ ئه‌و نوخبه‌ سیاسیه‌, سه‌رۆكایه‌تی‌ هه‌رێمیش هه‌ڵوه‌شێنێته‌وه‌,ئه‌گه‌ر هاتوو مه‌ترسی‌ له‌سه‌ر پێگه‌كه‌ی‌ و شه‌خسی‌ خۆی‌ دروست بوو.

واتا په‌رله‌مان و حكومه‌ت و سه‌رۆكایه‌تی‌ هه‌رێم سێبه‌ر و شه‌به‌حی‌ ده‌سه‌ڵاتێكی‌ ترن كه‌ فیعلیه‌و ئه‌م دامه‌زراوانه‌ به‌كۆ بوون به‌ میكیاج و سه‌ر پۆش بۆ ئه‌و ده‌سه‌ڵاته‌ی‌ كه‌سه‌رجه‌می‌ كاره‌ مافیایی و چه‌ته‌گه‌ریی و تاڵانیه‌كان لێیه‌وه‌  بیریان لێده‌كرێته‌وه‌ و بڕیاریان له‌سه‌ر ده‌درێت.

بۆیه‌ ده‌توانین بڵێین ئه‌زمونی‌ حكومڕانی‌ دوای‌ ڕاپه‌ڕین,به‌كۆ سێبه‌ر و شه‌به‌حی‌ ئه‌زموونی‌ شاخ له‌لایه‌ك و میراتی‌ به‌عسه‌ له‌لایه‌كی‌ تره‌وه‌ ,واتا شتێك نی‌ یه‌ به‌ ناوی‌ پرۆسه‌ی‌ كۆلاجكردنی‌ ئه‌زمونی‌ شاخ و شار ,به‌ڵكو ئه‌وه‌ی‌ هه‌یه‌ ئه‌زموونی‌ شاخ و ئه‌و بیركردنه‌ویه‌یه‌ كه‌ له‌ چل و شه‌سته‌كانی‌ سه‌ده‌ی‌ ڕابردوه‌وه‌كاری‌ له‌سه‌ر كراوه‌.

ڕه‌نگه‌ ئه‌و كاته‌ی‌ بارزانی‌ ده‌ڵێت من پێشمه‌رگه‌ی‌ كوردستانم,باشترین گوزارشت بێت له‌م بۆچوونه‌ی‌ سه‌ره‌وه‌م.
ئه‌و ده‌مه‌ی‌ بارزانی‌ ده‌ڵێت من پێشمه‌رگه‌ی‌ كوردستانم ده‌یه‌وێت دوو شتمان پێبڵێت ,یه‌كه‌میان:باوه‌ڕ بوونی‌ خۆی‌ دووپات ده‌كاته‌وه‌ به‌وه‌ی‌ كه‌ پۆستی‌ سه‌رۆكی‌ هه‌رێم ,پۆستێكه‌ ته‌نها ئه‌و كاته‌ ڕه‌وایه‌تی‌ هه‌یه‌ لای‌ ئه‌و كه‌ شه‌رعیه‌ت به‌ ده‌سه‌ڵاته‌ خێله‌كی و شۆڕشگێڕیه‌كه‌ی‌ بدات .

دووه‌میان و گرنگترینیان ئه‌وه‌یه‌ كه‌ وشه‌ی‌ پێشمه‌رگه‌ بۆ ئه‌وه‌ به‌كارناهێنێت كه‌ هاوسۆزی‌ و په‌رۆشی‌ خۆی‌ بۆ ژیانی‌ پێشمه‌رگه‌ و قاره‌مانێتی‌ پێشمه‌رگه‌ ده‌رببڕێت,وه‌ك هه‌ندێك كاسه‌لێس و ماستاوچی‌ حیزبی‌ وای‌ نیشان ده‌ده‌ن,به‌ڵكو مه‌به‌ستی‌ په‌یامێكی‌ تره‌ ئه‌ویش ئه‌وه‌یه‌ كه‌ ئه‌و هه‌ر خه‌باتگێڕه‌كه‌ی‌ جارانه‌و ,ئه‌وه‌ی‌ ئه‌مڕۆ به‌ده‌ست هاتوه‌ به‌ خه‌بات و قوربانی‌ دانی‌ ئه‌و به‌ ده‌ست هێنراوه‌ ,ئه‌و ده‌مه‌ی‌ كه‌ له‌ شاخه‌كان بوون و وه‌ك خۆیان ده‌ڵێن بۆ ئه‌وه‌ له‌وێ‌ بوون تا خه‌ڵكی‌ بگه‌یه‌نن به‌ ڕۆژێكی‌ پرشنگدار.

هه‌ر بۆیه‌ به‌ مافی‌ خۆیشی‌ ده‌زانێت كه‌ هه‌ر خۆی‌ كه‌سی‌ یه‌كه‌م و ئاخیره‌مینی‌ بڕیاردان بێت له‌سه‌ر چاره‌نووسی‌ ئێمه‌ له‌ ئێستا و داهاتوودا.

ئه‌وه‌ جگه‌له‌وه‌ی‌ به‌هه‌زاران خه‌ڵكی‌ ئازا و چاو نه‌ترس هه‌ڵخه‌ڵه‌تێنران ,یاخود دڵسۆزانه‌ و بێ ئاگا له‌وه‌ی‌ ئه‌و نوخبه‌یه‌ چین و كێن و چ نیازێكیان هه‌یه‌ ,خۆیان كرده‌ قوربانی‌ و شه‌هید و بریندار بوون,به‌بێ‌ ئه‌وه‌ی‌ ئه‌و به‌هایانه‌ی‌ ئه‌و خه‌ڵكه‌ پێی‌ وابوو نوخبه‌ سیاسیه‌كه‌ كاری‌ بۆ ده‌كات هیچی‌ به‌دیبێت .

3.سه‌ره‌نجام,حیسابكردنی‌ ته‌واوی‌ ئه‌م مێژووه‌(70 ساڵه‌)له‌سه‌ر ناسیۆنالیزمی‌ كوردی‌ و كوردایه‌تی‌,كه‌ ناسیۆنالیزمێكی‌ عه‌جیب و غه‌ریب و ناوازه‌یه‌,چونكه‌ له‌مه‌شدا تاقانه‌یی و بێوێنه‌یی خۆیان پاراستوه‌.

سه‌یرو سه‌مه‌ره‌ ئه‌وه‌یه‌ كه‌ هه‌رچی‌ ناسیۆنالیزمی‌ دنیا هه‌یه‌ و,به‌ڕای‌ چوار تیۆرسین و ئه‌كادمیستیش كه‌ باسیان له‌ ناسیۆنالیزم كردوه‌ ,ناسیۆنالیزم ئیش كردنه‌ له‌سه‌ر یه‌ك بوون و هاوبه‌شیه‌كان(یه‌ك بوونی‌ نه‌ته‌وه‌ ,زمانی‌ هاوبه‌ش,جوگرافیای‌ هاوبه‌ش خه‌ون و چاره‌نووسی‌ هاوبه‌ش),به‌ڵام ئه‌م نوخبه‌ سیاسی یه‌ نه‌ك كاریان له‌سه‌ر ئه‌و هاوبه‌شانه‌ نه‌كردوه‌ ,به‌ڵكو ئه‌گه‌ر له‌شوێنێكیش ئه‌م یه‌كبوونه‌ بوونی‌ هه‌بوبێت تێكیان شكاندوه‌ و ئه‌وه‌نده‌ی‌ دی‌ پارچه‌ پارچه‌یان كردوه‌,تا ئه‌و ئاسته‌ی‌ ده‌كرێت بڵێین ناسیۆنالیستێكه‌ كه‌له‌سه‌ر بنه‌مای‌ كورد به‌ كه‌مزانین و ڕق لێبونه‌وه‌ له‌ هاوڵاتیانی‌ خۆی‌ دامه‌زراوه‌, (هه‌رچه‌نده‌ من له‌گه‌ڵ ناسیۆنالیزمدا نیم و ده‌كرێت له‌ شوێنی‌ تر بگه‌ڕێمه‌وه‌ سه‌ری‌),به‌ڵام ده‌مه‌وێـت ئه‌وه‌ بڵێم كه‌ ده‌بێت ناسیۆنالیزمی‌ كوردی‌ كه‌ مانفێسته‌كه‌ی‌ كوردایه‌تی‌ یه‌ لێی بدرێت و هه‌ڵته‌كێنرێت,تا نه‌بێته‌ سه‌رچاوه‌ی‌ به‌رده‌وامی‌ ڕه‌وایه‌تی‌ نوخبه‌ی‌ سیاسی‌ به‌كاره‌كانیان.

هه‌موو ئه‌و لێكدانه‌وانه‌ی‌ سه‌ره‌وه‌ بۆ ئه‌وه‌ن,تا بڵێم,ئه‌م مێژووه‌ به‌كۆ ,مێژووی‌ قه‌یران و نه‌هامه‌تیه‌كانی‌ ئێمه‌یه‌ ,مێژووی‌ سه‌رگه‌ردانی‌ و ماڵوێرانیه‌كانی‌ ئێمه‌یه‌ كه‌ ئه‌م نوخبه‌ سیاسیه‌ لێێ‌ به‌رپرسه‌.

نوخبه‌یه‌ك كه‌ له‌ ئێستادا هیچ شتێكیان ڕه‌بت نابێته‌وه‌ له‌گه‌ڵ هاوڵاتیاندا ,نه‌ ستایلی‌ ژیانیان,نه‌كلتوریان ,نه‌ پێكه‌نین و زه‌رده‌خه‌نه‌كانیان,نه‌ كۆبونه‌وه‌كانیان نه‌ ماڵ و ڕێگا و خوێندن و نه‌خۆشیه‌كانیان,نه‌سه‌ردان و خواردن و جل و به‌رگه‌كانیان,نه‌ بیركردنه‌وه‌كانیان,ئه‌وان ته‌نها و ته‌نها یه‌ك شت ڕِه‌بتیان ده‌كاته‌وه‌ به‌ ئێمه‌وه‌ ,ئه‌ویش تیجاره‌ت و تاڵانی‌ و فه‌رهودكردنی‌ سامانه‌كانی‌ ئێمه‌یه‌.

بۆیه‌ چیدی‌ ئه‌مانه‌ یه‌ك زه‌ڕڕه‌ ,ناتوانن ئێمه‌ به‌خته‌وه‌ر كه‌ن,چونكه‌ ئه‌گه‌ر له‌ماوه‌ ی‌ حه‌فتا ساڵدا ویستی‌ ئه‌وه‌یان هه‌بووبێت و نه‌یانكردبێت,تازه‌ش ناتوانن بیكه‌ن.

خوێندراوەتەوە253