بابه‌كر دڕه‌یی

نەوت وەک دوانەی ئیستبداد‌


لە ناو خەڵک و هەروەها لە ناو توێژی رۆشنبیر و خاوەن قەڵەم دا وا باس دەکرێ کە ئیدی له‌ وڵاتی ئێمە هەمو کەس بۆتە " سیاسی" و ژیان تامی تیا نەماوە..

دەڵین: مەجلیسی ناو دایرەکانی حکومەت جگە لە سیاسەت باسی هیچی تر ناکرێ..
دەڵین: لە ماڵەکانیش باس هەر باسی سیاسەت و کاروباری ڕێکەوتنی حزبەکانە..
وا باسدەکەن ئیتر بە هۆی سیاسەتەوە تەنانەت دۆستایەتی و برادەرایەتیش روی لە کزی ناوە و پەیوەندی خۆشەویستی کۆتایی هاتوە...
سەرجەم رادیوو تیڤی و رۆژنامەکان سەرقاڵی گۆڕان یان نەگۆڕانی سیستەمن و هیچ ئاوێک نییە ئەم ئاگرە بەرەو کزی ببات!

ئەوەی لەم نێوەدا بزرەو کەس باسی ناکات ئەوەیە : بۆچی لە وڵاتی ئیمەو هەندێ وڵاتی هاوشیوەی ئیمەدا دەسەڵات وا خۆشەویستە و دەسەڵاتداران وەک زەرو پێوەی دەنوسێن و لێی نابنەوە؟

کەس ئەو پرسیارە ناکات : بۆچی لە دەیان وڵاتی تری جیهاندا خۆشەویستی دەسەلات بەم ئەندازەیە نییەو سیاسەتکارەکان دوای تەواوبونی خولی کارەکانیان، ئۆتۆماتیک دوردەکەونەوەو تەنانەت دو بەرد تەقەی نایەت...

وردبونەوەیەکی سادە لە هۆکاری بەسیاسیبونی کۆمەڵگا و ئالودەبونی هەموان بە گۆرانکارییەکانی دەسەلاتەوە ئەوەیە کە لە کۆمەڵگاکانی وەک ئیمەدا تاقمێک بە دەسەڵاتەوە دەنوسێن و لێی نابنەوە چونکە مادەیەک هەیە لە وڵاتەکەدا بە ئاسانی دەردێت و بە ئاسانی دەفرۆشرێت و بە ئاسانیش دەدزرێت..

ئەو مادە نەفرەتی و نگریسە بریتییە لە نەوت..

نەوت مادەیەکە دەتوانێ تاقم و گروپەکانی دەسەلات بە ئاسانی دەولەمەند بکات و بەهیزیان بکات.. دەتوانی بە ئاسانی پەیوەندی جیهانی و ئیقلیمیان بۆ پەیدا بکات.. دەتوانێ..دەتوانێ.. بیانکا بە ملهورو زۆردار بەسەر کۆمەلگاوە جونکە بژیوی و ژیانی کۆمەڵ بە ئەنقەست دەبەسریتەوە بەو مادە لەعنەتییەوە...

نەوت لە وڵاتی ئێمەدا وەک کانولای دەستیی نەخۆشخانەیەکی تایبەتی (نەک حکومی) لێهاتوە کە دکتور و پەرستارە بیویژدانەکان دەتوانن بە کەیفی خۆیان ئەو قەترە خوێنەی بڕیارە بکرێتە جەستەی نەخۆشەکانەوە کەم و زیاد بکەن و گەر بیانەوێ تا ئاستی مردنی ببەن ..

نەوت و ئیستبداد لە ناوچە نفرینلێکراوەکەی ئیمەدا دوانەیەکی مەترسیدارن و پیویستە هەمو هەوڵیک بخرێتە گەڕ ئەم دوانە لەعنەتییە، بە مقەستی چاکسازییەکی بوێرانە، لێکداببڕێن..

هاشوهوشی دەسەلاتدارانی وڵاتی ئێمەو هاوشێوەکانمان تەنها لەو ڕوەوە مەعنایەکی هەیە کە کانولای خوێنی کۆمەڵگایان کۆنترۆڵ کردوەو هەزاران هەزار کەس، بە زۆر یان بە خواهیشت، تەسلیمی گەمەی نائینسانی و ملهوڕانەی ئەوان بون و (بە هەڵە) پیان وایە هەناسەو ژیان و مانیان هەمیشە بەستراوە بە ئیرادەی خاوەن دەسەڵاتەکان و ئەوانەی لە زمانپاراوی و گەمەی وشەکاندا لە هەموان زیرەکتر دیارن...

چاکسازی لە وڵاتی ئێمەدا جگە لە خەونی چۆلەکە هیچی تر نییە تا نەتوانرێ نەوت و دەسەلاتی سیاسی بە شێوەیەکی کاربڕ و قەتعی لیکجیا دەبنەوە..

سیاسیبونی خەڵک و جاوبڕینیان لە دەسەڵات و گۆڕانی "سیستەم لە هەردو ڕوەوە هۆیەکەی ئەمەیە : ئەوانەی غەدریان لێدەکرێ و لە نیعمەتی ئەم "پیسایی شەیتان"ە بێبەشن، دەیانەوێ لانیکەم یەکسانییەکی نیسبی بەرقەرار بێت و ئەوانیش بەرهەمی چۆڕیکیان بە نسیب ببێت، و ئەوانەی بە هۆی نەوتەوە مناڵەکانیان لە هارڤارد و کەنداو دەخوێنن یان قومار دەکەن، لەسەر هەستن نەکا دۆخەکە تێکبچێ و ئیتر تاقمی دەسەلات وەک جاران نەتوانێ بیانپاریزێ..

خوێندراوەتەوە677