نەبەز گۆران

پارەی ژێرزەمینەكان لای منە!‌


هەڵبەتە زۆرجار بۆ ئەوەی بزانم دۆخەكە بەرەو كوێ‌ دەروات، نە گوێ  لە رۆشنبیرەكان دەگرم، نە لە سیاسییەكان. گوێ‌ لە نەوتفرۆشەكان دەگرم.

ئەوەی نەوتفرۆشەكان لەسەر دۆخی ئایندە دەیزانن، نە سیاسیەكان، نە رۆشنبیرەكان نایزانن. نەوتفرۆشەكان دوو روخساریان هەیە، روخسارێك كە لە میدیادا قسەی پێدەكەن، خۆیان دەكەنە فریادرەس و فریشتە و پاڵەوانی بەرگری خەڵك. ئەم روخسارەیان هەرگیز نە جێگای بروایە، نە دەبێت گوێی لێ‌ بگریت.

روخسارە راستەقینەكەیان ئەوكاتانە دەردەكەوێت، كتوپڕ لە شوێنێكی تایبەت دەكەونە ناو دۆخێك و هەندێك راستی دەڵێن. دەبێت تەنها لەوكاتانەدا بروا بە وتنەكانیان بكەیت.

یەكێك لە نەوتفرۆشە خۆشبینەكان، بروای وابوو:
((ئەم دۆخە لە ناوەراستی ئەمساڵدا گۆرانكارییەكی بەسەردا دێت. گۆرانكارییەكەش بەرزبوونەوەی نرخی نەوتە و، كەمێك لە دەوڵەتە نه‌وتفرۆشەكانی ئەم ناوچەیە، دە بوژێنەوە.))

رەنگە ئەم قسەیە زۆر خەیاڵی بێت و، جێگای بروا نەبێت. بەڵام بە دیوێكی تردا بۆئەوەی ناوچەكە لەوە زیاتر بەرەو دارمان نەروات، ئەشێت ئەمە رووبدات.(ئەمە قسەی من نیە، قسەی نەوتفرۆشێكی خۆشباوەرە كە ئاوا بیردەكاتەوە!)

ئێستا ئێمە، لە دۆخێكی خراپی سیاسی و ئابووریداین. خراپی دۆخەكە وایكردووە، هەركەسێك لە سیاسیەكان، یان سیاسیە نەوتفرۆشەكان، كە لە میدیاكانەوە قسە دەكەن دەیانەوێت وا قسە بكەن، كە خۆیان بەشێك نین لە دروستكردنی ئەم دۆخە! وا وێنای خۆیان دەكەن بەشە جوانەكەی ئەم هەرێمەن و، بەرپرسیارنین لە خراپییەكان.

میدیای كوردیش لەبەر ئەوەی میدیایەكە زۆر سەرسامە بە سیاسیەكان، هەمیشە بووەتە شوێنێك بۆ پاككردنەوەی روخسارە ناشیرینەكانی سیاسیە نەوتفرۆشەكان و، سیاسیە بخۆرەكانی سەروەت و سامانی گشتی.

میدیا فەزایەكی دروستكردوە، هەر یەكێك لەو سیاسیە نەوتفرۆشانە دێتە گۆ، باسی خراپی ئەوانی تردەكات و باس لەوە دەكات، دەبێت پارە براوەكان و، پارەی ژێرزەمینەكان بهێنرێتەوە و بگەرێنرێتەوە بۆ خەڵك. یانی، فەزایەك دروستبووە، وەك بڵێیت: پارەی ژێر زەمینەكان لای ئێمەی بەدبەخت بێت و، پێویستە بیگەرێنینەوە. ئەو رووە ناراستەی سیاسیە نەوتفرۆشەكان كە لە میدیاكانەوە دەیبینین، روێكی باوەرپێنەكراوە. روێكە هەرگیز لای ئەوانەی كە زانیارییان لەسەر جموجوڵە ئابوورییەكان هەیە، نابێتە شوێنی برواكردن.

كێشەكە لەوەدایە، هێشتا مرۆڤگەلێك هەیە بروا بەم جۆرە وتانە دەكات، كە شەوان لە رێگای میدیاكانەوە، وەك ژەهرێك دەدرێت بە گوێیاندا.

راستیەكەی ئەوەیە، ئەو پارانەی براون، ئیدی پارەی بوددجەبن، یان پارەی نەوت، یان هەر پارەیەكی دیكە، بە قسەی میدیایی ناگەرێتەوە. دەبێت یاساییەك هەبێت بۆ گەرانەوەی ئەو موڵكە گشتییە.

ئێمە لەم دۆخەدا پێش هەمووشت لە بێ‌ یاسایی و لە نەبوونی چاودێریی و، لە پەكخستنی پەرلەماندا، گیرۆدەبووین. حیزبە سیاسیەكانیش دابەشبوون بەسەر دوو بەرەی دژ بەیەك، بەرەی گەرانەوەی یاسا و، بەرەی كوشتنی یاسا لە پێناو كەسێك.

پێش هەمووشت پێویستە دۆخە سیاسیە ئاڵۆزەكە چاككبكرێـتەوە. پاش ئەو دۆخە، جارێكی كە دۆخی دەزگا پەكخراوەكان چاكبكرێتەوە، نەك بەو بیركردنەوە خێڵەكیەی (پارتی) بەڵكو، بە بیركردنەوەیەكی دروستی كوردانەوە. كە ئەمانە چاككبوونەوە ئیدی بیرێك لە بنەوانە ئابوورییەكە بكرێتەوە. لەبری خۆ بە پاكزان و خۆ بەپاڵەوانكردن لە میدیادا، بە یاسا موڵكە گشتییەكان، پارە برواوەكان بگەرێنرێنەوە و، چیدی میدیا نەكرێتە مینبەرێك بۆ ئەو  سیاسیە نەوتفرۆشانە و، ئەو كەسە بخۆرانەی سەروەتی گشتی، هەتاكو بێن، باس لەگەرانەوەی پارەكان بكەن. چونكە خۆیان بەشێكن لە دروستكردنی ئەو فەزاییە و، هیچكام لەو خۆ بە پاڵەوان زانانە بێ‌ بەری نین لەم دۆخە. هەریەكەیان پشكی خۆی بەردەكەوێت.

گەروا نیە، كەوایە پارەی ژێرزەمینەكان لای ئەوان نیە و لای ئێمەی بەدبەختە و، بفەرموون وەرن بیبەنەوە و دۆخەكەی پێ‌ چارەبكەن!

خوێندراوەتەوە3907