شەماڵ عەبدولوەفا

جەنابی سەرۆک وانابێت‌


ئەمە چاکسازی نیە، بەڵکو دەستگرتنەوەیەکی سەرپێییە، سەرۆکی حکومەت و پیاوێکی سیاسی وەکو تۆ ناشێت نەزانێت چاکسازی چۆن دەکرێت بەدەستگرتنەوەیەکی سەرپێی بڵێت چاکسازی و هەندێ کەس و لایەن بکەونە بەیت و بالۆرە لێدان و دڵی خۆیان و جەماوەرەکەیان بەوە خۆش بکەن کە چاکسازی بەڕێوەیە.

لە ئێستای هەرێمدا گەر نەشزانیت چاکسازی چییە حەقە پرسێک بە راوێژکارە لێهاتوەکانت بکەیت، پێش هەمو شتێک دەبێت چاکسازی سیاسی دەست پێ بکەیت، لەسەر سیستم و شێوازی حوکم رێکبکەون (لانیکەم ناوماڵی سیاسی هەرێم چاک بکەن) نەک ئەوەی لە ئێستادا دەگوزەرێت لە هەرێم دا کە هیچ شتێک لە شوێنی خۆی نەماوە، گەر ئەمەشت لا زۆر گرانە ئەوجا وەرە دەست بۆ دارایی بەرە، عەیب نەبو بگەڕێیتەوە بۆ پڕۆژەکەی وەزارەتی دارایی کە دایانڕشتبو پێش ئەوەی وەزیرەکەی هەولێر بەدەر بکەن، یان بگەڕێیتەوە بۆ پاکێجەکانی ئۆپۆزیسیۆن، بەڵام ئەوەش عەیبە چونکە نابیت سەرۆک!  بگەڕێتەوە بۆ پڕۆژەی وەزیرێک کە خۆی دەری کردوە یان پڕۆژەی ئۆپۆزیسۆن کە خۆی بڕوای بە دیموکراتیەت نەماوە.

دوای ئەوە گرنگترین جومگە (بازاڕە) گەر راست دەکەن بچن بازاڕ رێکبخەن (کە دەڵێم بازاڕ سەرتاپا بازاڕ دەگرێتەوە ئەوەی پەیوەندی بە بازاڕو نەوت و بانک و وەبەرهێنان و بازرگانی گەورە و دنیای مۆبایل و مۆڵەکان و..)، گەر حکومەتمان هەبێت دەبێت بەم شێوەیە مامەڵە لەگەڵ بازاڕ بکات:
1. چاودێری بکات
2. رێکی بخات
3.  پارێزگاری لێ بکات
4.  هاوسەنگی تێیدا رابگرێت.

گرنگترینیشیان نەهێڵێت قۆرخ بکرێت و کارەکتەرەکانی حکومەت ودەسەڵات نەبنە شەریکی بازاڕ، جەنابی سەرۆک ئێستا بازاڕەکەت مافیا دەیبات بەڕێوە (نازانم ئاگات لێ یە یان نا !؟)

ئایا مافیاکان دەناسیت کێن، یان لە دەسەڵاتدا کێ شەریکیانە!؟ لە بواری نەوت، بازرگانیە گەورەکان، وەبەرهێنە گەورەکان، ئەوەی لە بازاڕە ئازادەکەی تۆدا ماوە بۆ خەڵکی کە بازرگانی پێوە بکەن (تەماتەو خەیارە) ئەوانەی تر جەنابت دەزانیت بەدەست کێوەیە؟.

دوای دارایی و بازاڕ با بێینە سەر دادوەری، یەکێک لە دامەزراوە گرنگەکان لە چاکسازی دا دەسەڵاتی دادوەرییە دەبێت پێش هەمو شتێک ئەم دەسەڵاتە لە قۆرخکاری دەربهێنین ئەوجا وازی لێ بهێنین کە .

آ- سەروەری خۆی هەبێت
ب – پیشەیی بێت
ج – سەربەخۆبێت

پرسیارێک دێتە پێش ئایا دەسەڵاتی دادوەری ئێمە ئەم سیفەتانەی تێدایە تا ئەم دەسەڵاتە یاریدەدەرێکی باش بێت بۆ چاکسازی؟.

پەرلەمان لەکوێی ئەم پرسە دایە؟. پەرلەمان چەند ئەرکێکی هەیە:
- نوێنەرایەتی ڕاستەقینەی دەنگدەرەکانیان .
- چاودێری و لێپرسینەوەی حکومەت.
- یاسادانان.
- رێکخستنی بودجە.

کام پەرلەمان!؟ کوا پەرلەمان!؟ ئەو پەرلەمانەی کە حیزبەکەی بەڕێزت مردارتان کردەوە.

کاتی ئەوە هاتوە راگوزەرانە باسێکی سەرۆکی هەرێمیش بکەین، کە دەبوایە چی بکردایە
١ – پێش هەمو شتێک دەبوایە وازی لە سەرۆکایەتی حیزبەکەی بهێنایە، تا بتوانێت ببێتە سەرۆکی راستەقینەی هەرێم.
٢- یەکخستنەوەی دو ئیدارەیی و دروستکردنی ئیرادەیەکی نەتەوەیی خاوەن ستراتیژ.
٣ – یەکخستنەوەی هێزی پێشمەرگە و هەواڵگریەکان و ئاسایش و ناوخۆ و زانیارییەکان ..هتد.
٤ – دابەشنەکردنی ناوچە دابڕێنراوەکان.
٥ – دابەشنەکردنی کورد بەسەر (تورکیا و ئێران و سونە و شیعە) دا.
٦ – چاکسازی و بنبڕکردنی گەندەڵی.
٧ – بەرەوپێش بردنی هاوڵاتی بون و عەدالەتی کۆمەڵایەتی.
٨ – شەفافیەت لە بوارە ستراتیژی و نەتەوەیی و پەیوەندییەکان دا.

چی لەمانەو لە دەیانی تر لەمانە جێبەجێ کران!؟.

بابزانین کامیانی کردوە، نەک هیچ یەک لەمانەی نەکردوە، بەڵکو تازە بە تازە خەریکی دابەشکردنی ماڵی کوردە بە شێوازێکی نوێ.

دوا قسەم لەسەر حکومەتی هەرێم
بەڵام لە ئێستادا کە دەڵێیت حکومەتی هەرێم دەبێت لەنێو دو کەوانەدا بنوسیت (خاوەندارییەکەی دەگەڕێتەوە بۆ پارتی دیموکراتی کوردستان)، فەیلەسوفی ئەڵمانی (ئەمانۆیڵ کانت) پێش زیاتر لە (٢٥٠) ساڵ لەمەوبەر دەربارەی حکومەت دەڵێت، ئەرکی حکومەت بەرامبەر هاونیشتمانیانی.
١ – سەر و سامانیان بپارێزێت.
٢ – لانی کەمی ژیانیان بۆ مسۆگەر بکات.

گەر نەیتوانی ئەمانە بکات حکومەتەکە دەبێت بە (پاسەوانی شەو؟). پاسەوانی شەویش تەنها دەتوانێت یان ریزە ماڵێک یان ریزە دوکانێک بپارێزێت جا با هەمومان پێکەوە گەر ویژدان مابێت هەڵسەنگاندنێک بکەین، ئەمە حکومەتە یان پاسەوانی شەوە! ئەمە وەزعی سەرۆکایەتی هەرێمە، ئەوەش بارودۆخی حکومەتە، بازاڕیش مافیا دەیبات بەڕێوە، پەرلەمان لە ماڵەوەیە، ئیتر لەم فەزایەدا باسی چاکسازی چی دەکەن! گەر ئازان و خۆتان بە دڵسۆزی ئەم گەلە ئەزانن!؟.

١ – مەیەڵن ماڵی کورد دابەش ببێت.
٢ – هەوڵ بدەن ئەو مافیاییەی حکومەتی هەرێم دەبات بەڕێوە لەبەریەک هەڵیبوەشێنن.
٣ – دوا قسەشم ئەوەیە، چاکسازی بە دامەزراوەی تۆکمەو ئیرادەی بەهێز دەکرێت، ئایا ئێمە ئەم دوانەیەمان هەیە، بەدڵنیایەوە نەخێر. 

خوێندراوەتەوە2813