بابه‌كر دڕه‌یی

حزب و ئازادی بەیان...‌


بە دڵنیاییەوە کاتی ئەوە هاتوە تێبگەین جیاوازی چیە لە نێوان ڕۆژنامەگەری سەربەست و رۆژنامەگەری بندیوار (سێبەر), و هەقە کۆمەڵگا لەوە بە ئاگا بێت: کێن ئەو هێز و حزبانەی لە پشت سەقەتکردن و بەلاڕیدابردنی گرنگترین دەسکەوتی سیاسی ئەم وڵاتەوەن کە بریتییە لە ئازادی بەیان !

بە پێێ دوایین ئاماری رەسمی، ئێستا لە هەریمی کوردستاندا:
٥٥١ گۆڤار و ٢٢٠ ڕۆژنامە چاپ و بڵاودەکرینەوە...
هەروەها:
١٤٨ کەناڵی رادیویی ( بیستراو)
و
٩٤ کەناڵی تەلەفزیۆنی ( بینراو و بیستراو)
٤٣ کەناڵی ئاسمانی ( بینراو و بیستراو)
بەردەوام لە پەخشدان و چاو و گوێ و زەینی کۆمەڵ دەخەنە ژێر کاریگەری فکری و روحی یەوە...

لە ٢٤ی نیسانی ئەمساڵدا، سەندیکای رۆژنامەنوسان کۆنفرانسیکی لە شاری هەولیر سەبارەت بە دۆخی رۆژنامەگەری و پەسندکردنی کۆمەڵیک بنەمای ئیتیک بۆ ریفۆرم و ڕێکخستنەوەی هەلومەرجی رۆژنامەگەری سازدا... لەم کۆنفرەنسەدا دەیان کەسی شارەزاو دڵسۆز قسەیان کردو تەنانەت پرۆژەی نوێش بۆ دانانی چوارچیوەیەکی گونجاوتر بۆ کاری ڕۆژنامەگەری قسەی لیوەکرا...

رەنگە لە داهاتوشدا سەندیکای ڕۆژنامەنوسان و لایەنە خەمخۆرەکانی تر کۆنفرەنس و سیمینار و پانیل بۆ هەمان مەبەست ئامادە بکەن...

دەگونجێ لە مسال و سالانی داهاتودا سەدان وتاری باش دەربارەی ئیتیکی رۆژنامەوانی و 'سنوری کاری ڕۆژنامەنوس" و "مەترسییەکانی ئازادی رۆژنامەنوس بۆ سەر ئاسایشی نیشتیمانی" بنوسرێ...

پیدەچی لە بناغەوە هەوڵ لە ئارادا بێت بۆ دەسکاریکردنی "یاسای کاری رۆژنامەنوسی" و بەرتەسککردنەوەی ئەو ئازادییەی خودی ئەم یاسایە فەراهەمی کردوە بۆ کاری میدیایی..

بەڵام ئەوەی گرنگەو پیویستە ئاگامان لێی بێت و بە دیقەت و خەمخۆرییەکی نیشتیمانییەوە سەرنجی بدەین ئەو پارە زۆرەیە کە لە بودجەی گشتی میللەت سەرفئەکری بۆ ڕۆژنامەی زەردو بندیوار...

ئەوەی جێی بایەخە ئەو چەند کەناڵ و رۆژنامانە نین کە حسابیان دیارەو کەسایەتییەکانی پشتیانەوە زۆرینەی میللەت دەیانناسێ، بەڵکو ئەو دەیان و سەدان ڕۆژنامەو سایت و رادیویانەن کە نە حسابیان دیارە و نە کتاب..

ئەوەی جێی سەرنج و مەترسییە، تارمایی ئەو کەسە نادیارانەیە کە کۆمەڵگای ئیمەیان داوەتە بەر تۆپخانەو دۆشکای فکر و هەواڵ و زەینی مەترسیدار و نە سەریان دیارەو نە بن...

مەترسی ئێستای وڵاتی ئێمە لەو شوێنەوە نییە کە گوایە ئازادی بەرتەسک دەکرێتەوە یاخود سەرکوتی ئازادی دێتە ئاراوە، بەڵکو لەو شوێنەوەیە کە، بەحوکمی ترسان لەوەی هیچ کاربەدەستێک بە دژایەتی ئازادی تاوانبار نەکرێ، خودی ئازادی بەیان ببێتە سەکۆیەک بۆ تێکدانی ئازادی و بڵاوکردنەوەی ئەو میکرۆب و ڤایرۆسە فکریانەی بە هیچ هیز و حکومەتێک عیلاج ناکرێن و دەرمانیان بۆ نادۆزرێتەوە....

بەڵای گەورەی وڵاتی ئیمە لەم ئان و ساتەدا ئازادی بەیان و رۆژنامەوانی نییە بەڵکو خراپ بەکارهێنانی ئازادیە لە لایەن خودی ئەو حزبانەی بودجە و پارەی بێسنوور بۆ میدیای بندیوار ئەرەخسێنن و نەوەیەک لە کەسانی ساختەو نەفام و بەکرێگیراو بۆ ململانێی سیاسی بەکاردێنن...

کارەساتێک بەڕیوەیە کە ئاسەوارەکانی بۆ چەندین دەیەی تر لەم وڵاتەدا ئەمێنێتەوە: ئەویش شلکردنی تورەکەی پارەیە بۆ قەلەمە بەکرێگیراوەکان تا بە سودوەرگرتن لە ئازادی رۆژنامەگەری رزقی حەرام بخۆن و ڕیزێک بۆ ئازادی و فکری بنیاتنەرانە نەهێڵنەوە..

کارەساتێک بەڕیوەیە کە لەم شەیتان بازارەدا کەسانێکی تریش هێزپەیابکەن کە، دواتر، هەم قاسەی پارەو هەم خاوەن قاسەی پارەو هەم کۆی کۆمەڵگا بەرەو حوکمێکی داعشیانە بەرن و ئەوساش کەس فریای شکاندنی کاڵەک نەکەوێ بە ئەژنۆی...

خوێندراوەتەوە693