بابه‌كر دڕه‌یی

ئەردۆگان: یان دیکتاتۆری یان هیچ!‌


بارودۆخی تورکیا بۆ ئیمەی کورد هەمیشە گرنگییەکی زۆری هەیە. تورکیا وڵاتیکی ٨٠ ملیۆنییەو لە باری جیۆسیاسیەوە یەکیکە لە ولاتە هەرە گرنگەکانی جیهان.

زیاتر لە بیست ملیۆن کورد لە تورکیا وجودیان هەیە و کاری حزبایەتی و میدیای ئازاد لەو وڵاتە وەک هیچکام لە دراوسێ مێژوییەکانی کورد نییە. ئەگەر لە ئیران سەرەکوەزییران و شۆڕشگێرە ئیسلامییە پلەباڵاکانی سەرەتای " ئینقلاب ئیسلامی" لە زیندان دائەڕزێن و، لە عیراق دەعبایەکی وەک داعش بەهۆی نەفامی و مەغروریەتی مالکی و کلتوری توندوتیژی سوننەوە بە ئاسانی سەرهەڵئەدەن، لە تورکیا سیاسەت بە جۆرێکی ئیجگار جیاواز ڕێڕەوی خۆی دەگریت و کارو کادانەوەکان لە ئاستێکی زۆر باڵاتری جەدەلی سیاسی و فکریدا روبەڕو دەبنەوە.. لە گشت حاڵێکدا لە تورکیا مرۆڤگەلێک دەژین و سیاسەت بەرهەم دەهینن کە پێشخستنی تورکیاو جوانکردنی وڵاتەکەیان لە سەرو هەموشتێکەوە داناوە..

ئەردۆگان ماوەیەکی زۆرە لە حوکمدایەو بە هینانی ئۆغڵو بۆ شوێنە کۆنەکەی خۆی، هێندەی تر بوغرا بوەو ئیستا دەیەوی قانونی بناغەیی وڵاتیش لە پەرلەمانییەوە بگۆڕێ بۆ سەرۆکایەتی و دەسەڵاتەکانی ئیسلامی سیاسی بە شێوەی خۆی و AKP هیندەیتر قایمبکات..

هەولەکانی ئەو بۆ گوڕێنی دەستور و تێپەڕاندنی یاسایەک بۆ زیادکردنی دەسەلاتی پۆلیس، روبەڕوی توندترین رەخنەو نارەزایەتی رکەبەرەکانی بۆتەوەو جگە لە سێ حزبە سەرەکییەکە، جەریانی "بزوتنەوەی خزمەت" ی کۆنە هاوڕێیشی( فەتحوللا گولەن) ئاوێتە بوە..

دیارە هەرکام لەم حزبانە ئامانجێک دژ بە ئەردۆگان ئەیانجوڵێنێ..

کورد (HDP) لە باکور پێی وایە زیادبونی دەسەلاتی ئەردۆگان جۆریکە لە ئیستیبداد و لە دۆخێکی ئیستیبدادیدا مافی کورد هیندەی تر ئەخرێتە ژیر پێ..

چەپەکان و کۆمارییەکان ( CHP و MHP ) هەریەکەیان بە هۆکاری سیاسی و مەنتقی دژ بە پرۆژەکەی ئەردۆگانن: جەهەپە پێێ وایە ئەم هەوڵە بۆ ڕماندنی خەونەکانی ئەتاتورکە بۆ مانەوەی سیستمی سیکۆلار و نائاینی، چەپەکانیش بە هەمو حوکمێک ( بێگومان) ناچنە ژیر باری حکومەتێک کە دەسەلات بەدەست ئیسلامییەکی تاکڕەو ناعادل و گەندەڵ بێت..

بزوتنەوەی خزمەت کە ئیستە لە هەموان زیاتر لە ژیر چەکوشی پڕلەقینی ئەردۆگاندایە، بە سەبرێکی ئەیوبییەوە چاوەریی ئەو ڕۆژەیە کە خەونەکەی ئەردۆگان ببێتە مۆتەکەو بچێتە سەرشانی و نغرۆی ناخی زەوی بکات.. بە تایبەت کە ئەمان زۆرترین ئیهانەو بوختانەکانی هاوڕێ کۆنەکەیان لەم دو سالەی دواییدا بەرکەوت و بەو هۆیەشەوە ، سۆفی ئاسا، چاوەڕیی هەر کارەساتێکن بەسەریان بێت جا پێش ئەوەی ئەردۆگان لە لوتکە بکەوێتە خوارەوە یان (خۆیان وتەنی) لە گریمانەی ئەو کاتەدا کە خەونەکەی بێتە دی و بتوانێ دەستوور بکاتە دەستورێکی ئیسلامی - ئیستیبدادی لەو جۆرەی مورسی هەوڵیدا لە میسر و بۆی نەچوە سەر..

زۆری نەماوە تورکیا بکەوێتە بەردەم دوڕیانێکی گرنگ. یاریکەری ئەسڵی ئەو گەمە سیاسیەش AKP و رەجەب تەییب ئەردۆگان ە.. ئەو پیاوە تاکرەوەش یان دەبێتە دیکتاتۆر لە بابەتی جەنراڵەکانی هەشتاکان و ئاگری شەڕیکی ناوخۆیی مەترسیدارو خوێناوی دائەگیرسێنێ ، یان یەکێ لە دورگەکانی دەریای ئیجەو مەرمەرە دەبێتە دوا مەنزلگای و حاڵی لە حاڵی ئۆج ئالانی ئێمە باشتر نابێت..

خوێندراوەتەوە1233