بابه‌كر دڕه‌یی

تاوان دیار و تاوانکار نادیار!‌


هەرێمی کوردستان لە وڵاتە هەرە دەگمەنەکانی جیهانە کە تاوانی تیا ڕو ئەدات بێ ئەوەی هیچ دەزگایەک لە تاوانکاران بپرسێتەوە...

کوردستان لە وڵاتە کەموێنەکانی جیهانە کە دەسەڵاتدارەکانی، حزب و گروپەکانی خۆیانیان لا پیرۆزتر و گرنگترە لە دامودەزگاکانی دەوڵەت و حوکمرانی مۆدێرن.

هەریمی کوردستان لەو ناوچە تاقانانەی جیهانە کە کۆمپانیا سەرمایەدارەکان بە تەواوی کۆنترۆلی وەزعیان کردوە و لیپرسراوە حزبییە بچوکەکان و کارمەندانی حکومەت بە ئەندازەیەک لێیان ترساون کە ناوێرن تەنانەت لە ملکومالی حکومەتیش بپرسنەوە و بەم هۆیەوە بایی ملیۆنەها دۆلار مڵکی حکومەت بۆتە مڵکی کۆمپانیاکان.. ئەو کۆمپانیایانەی کە لە بەرنامە تەلفزیۆنیەکانیا راستی و درۆیان بۆ خەڵک ساغ بۆتەوە..

کۆمپانیاکانی سەرمایەداری وڵاتەکەمان بەریوە ئەبەن.. سەرمایەدارە "شۆڕشگێرەکان" و خزمە پلەیەک و پلە دوو پلە سێ و دورتر و دورترەکانیان..

ولاتەکەمان پڕیەتی لە تاوانکار بەڵام بە حوکمی بەهێزی خاوەن کۆمپانیاکان و کەسایەتییە حزبییە بەهیزەکان (تۆ بڵێ لاوازو ملکەچەکان) ی شەریکیان هیچ تاوانێک ناچیتە بەردەم دادگا و ژیان هەروا بە ڕێوە ئەچیت..

دڵنیابن بە خۆرایی و بێ حیکمەت نییە دوای تێپەرینی ٢٠١٥ ساڵ بەسەر لەدایکبونی حەزرەتی مەسیحا هێشتاش لە ٦٠ ملیۆن کورد تەنها لە تاقە پارچەیەکی کوردستانا (دانیشتوانی ٥ ملیۆنە ! ) نیمچە ئازادییەک هەیە و لێرەش دەولەمەندو سەرمایەدارەکانی بینای ٨ قاتی بە ١٢ قات بە هەژارانی میللەتەکە ئەفرۆشنەوەو بە ئاشکرا پارەکەیان ئەخۆن. .

دڵنیابن ئەم ئەگەر ئەو بێچوە دوپشکانە نەبرێنە بەردەم دادگاو سزای یاسایی و رەوایان بە سەرا نەسەپێنرێ، حوکمرانی کوردی و خۆماڵی جگە لە خەون و تراویلکە شتێکی تر نابێت..

وڵاتیک پڕ لە تاوان.. بەڵام خاڵی لە تاوانکار و دادگاو سیاسەتمەداری ئازاو نەترس و بێمنەت لە هەمو کەس...

خوێندراوەتەوە843