بابه‌كر دڕه‌یی

لە کەسابەتی خوێنەوە بۆ کەسابەتی نەوت و چەک!‌


ڕەنگە کەمکەس وەک نوسەری ئەم دێڕانە ئاگاداری شەڕی براکوژی یەکێتی و پارتی بێت لە سەرەتای مایسی ١٩٩٤ دا... ئەوکات من کارگێڕی مەڵبەندی ٨ی ڕاپەڕین بوم کە بارەگاکەی لە شاری ڕانیە بو.

شەڕی ناوخۆی کوردستان کە هۆکاری هەڵایسان و درێژەکێشانی بابەتی ئیجگار کەمبایەخ و ناسیاسیانە بو ،گەورەترین جەزرەبەی لە جەستەو ڕوح و ئیمکانات و سومعەی گەلی ئێمە وەشاند و سەرباری دروستکردنی دیوارێک لە بێمتمانەیی لە نیوان پارتی و یەکێتیدا کە هیشتاش ئاسەوارەکانی ماون، خوێنی کەسانێکی زۆر ئازیز و شارەزای لەم میللەتە سەند کە هەرگیز جێگاکەیان پڕ نابێتەوە..

بە دڵنیاییەوە ئەیڵێم و ئەتوانم بە نوسین و بە بەڵگەش بیسەلمینم کە هیچکام لە بەڕیزان مام جەلال تاڵەبانی و کاک مەسعود بارزانی هۆکارو هەڵگیرسێنەری ئەو شەڕە نەبون.. بە دڵنییاییەوە ئەتوانم بۆ گەلەگەمی باس بکەم کە کەسانی نامەسئول و جڵێس و شەڕانی و بەدخو، کەسانی خۆپەرست و نەزان و قینلەدڵ بونە مایەی هەڵگیرسانی ئەو شەرە: هەر لە شاری قەڵادزەوە تا ئەگاتەوە بە ڕانیەو شەقڵاوەو شوێنەکانی تری کوردستان!

کەسانێک لە ئاستەکانی خوارەوەی دەسەڵات، کەسانێک کە دڵیان پڕبو لە تاریکی و قین و نەفرەت و تەماعی پارەو پۆست ئەو شەڕەیان هەڵگیرساند و سەدان کەس لە ڕٶلە ئازاکانی ئەم گەلەیان بە کوشت دا..

کەسانێک بون حەزیان لە کەسابەتی خوێن بو تا ڕقی خۆیان بە بەرامبەرەکەیان بڕێژن بەڵام ئەوان گەلی ئیمەیان توشی کارەسات کرد..

ئێستەش نەوەیەکی تر لەو چڵێس و خۆپەرستانە ئەیانەوێ کورد ڕیسوا بکەن و دوژمنێکی وەک داعش لە بەرامبەریا بەهێز بکەن ... نەوتی لێئەکرن یان پێئەفرۆشن!

ئیستا تاقمێکی تر لەو توخمە سەریان دەرهێناوەو ئەیانەوێ چەکی وڵاتان لە کوردستان ساغ بکەنەوە و فڕۆکەخانەکان بکەنە مەزادخانە بۆ فرۆشتنی ئامرازەکانی ئینسان کوشتن ئەگەر تەنانەت کوژراوەکان لە خاڵۆزاو پورزاکانی خۆشیان بێت..

ئەم گەمە پڕ لە شەرمەزاریە ئەبێ بوەستێنرێ..
ئەم کەسابەتی نەوت و چەکە هیچ جیاوازییەکی لەگەڵ ئەو کەسابەتی خوێنە نییە کە تاقمێک ئاژاوەگیر لە ساڵی ١٩٩٤ دەستیان پێکرد و ئاگرەکەیان کردەوە..

ئەو ڕاستییەی ئەبێ پیش هەر ڕاستییەکی تر بوترێ ئەمەیە:
هەروەک چۆن ئیستاش خەڵکی کوردستان ، بە هۆی نەبونی زانیاری تەواو لە سەر شەری ١٩٩٤ تاوانی شەڕەکە ئەدەنە پاڵ رابەرانی یەکیتی و پارتی و لە یادوەری خۆیانا شوێنێکیان بۆ مەحکومکردنیان تەرخان کردوە، هەرواش ئەگەر کاربەدەستان لە سەرۆکایەتی هەریم و حکومەت و پەرلەمان ئەم کاسبیە مەترسیدار و ئابروبەرانە نەوەستێنن و تاوانبارەکانی نەدەنە دادگا، بە هەمان تۆمەتی شەڕی براکوژی بیست ساڵ پیش ئیستە مەحکوم ئەکرێنەوە..

ئەم کاسبییە دور لە شەرەف و ویژدانە بوەستێنن و وا بکەن دادگا سزای هەرە قورس بەسەر کەسەکانی ڕیزی پێشەوەو دواوەی ئەم تاوانەدا بسەپێنێ..

ئەم کاسبییە بوەستێنن.. نیشتیمانسازی و دەوڵەتسازی لە گرەوی ئەوەدایە کەسانی خۆپەرست و هەلپەرست و خائین لە ڕیزەکانمانا نەبن..
بیانوەستینن.. بیانخەنە زیندان و بیانکەنە عیبرەت بۆ کەسانی تر..
‎لە راستەوە: مستەفا درەیی ( برازام) ، بابکر درەیی،مامە هیرۆیی، عومەر محیدین ( لە شەری براکوژی شەهیدکرا)، عەلی مام جوتیار( کوری شەهید مام جوتیار)، ئەحمەد درەیی‎
‎کۆبونەوەی ستافی تەواوی مەڵبەندی رانیە ..مستەفا سەید قادر و بابکر درەیی رویان لە دانیشتوەکانە...‎
‎لە راستەوە: قەرەنی ئاغا، ئەحمەدی حاجی قادر( تەنیا سەری دیارە) ، ڕەحیم حاجی خدر، حەمەسەعید قادر درەیی، کاکم( عەلی درەیی) بابکر درەیی..‎

خوێندراوەتەوە2065