بابه‌كر دڕه‌یی

ئایا عەببادی ئیمەی خۆش ئەوێت؟‌

ئەو وتارەی خوارەوە لە کاتی خۆیدا دژی مالکی نوسراوە و بلاوکراوەتەوە.. ئایا پێتان وایە بۆ عەببادیش هەمان شیکردنەوە ڕاست دەرئەچێ یان جیاوازیان ئەبێت،،؟ تکایە..

مالیکی ئێمەی خۆش ناوێت!
سالانیکی دورو درێژە گەلی کورد لە چوارچێوەی عیراقدا گیری خواردوە و بە ئامان و زامان نەیتوانیوە خۆی ڕاپسکیوێ و هەنگاوێکی موغامەرەئاسا بۆ دەربازبوون لەم قەفەزە پۆلاینە ئەنجام بدات..

دوای ڕۆشتنی سەدام و ڕژێمەکەی، باردۆخ گۆڕاو ئومێدێک هاتە ئاراوە کە گەلی ئیمە لە کۆڵ مەسەلەی "براگەورە"و "برابچوکە" ئەبێتەوە و ئەتوانێ لە چوارچێوەی عیراقێکی دیموکراتدا بەو ئاواتانە بگات کە بۆ زیاتر لە ٩٠ ساڵ خوێنی بۆ بەخشیبو.

ناسیونالیزمی عەرەبی لە عیراقدا ئایدیۆلۆژیایەکی کۆن و سەقامگرتوە. لە سەرەتای تەلبەندکردنی سنورەکانی عیراق و دابڕینی کورد لە قوڵایی ستراتیژی خۆی و لکاندنی زۆرەملێی بەم بەشەی عەرەبی عیراقەوە، ژمارەیەک ڕۆشنبیری لە بابەتی ساتع ئەلحەسری و لە قۆناغەکانی دواترا کەسانی وەک میشیل عەفلەق و ئەلیاس فەرەح بە وردەکارییەکی زۆرەوە ئەو بیروباوەرانەیان مشتوماڵ کردوە کە کورتیەکەی بەم جۆرەیە:
یەکەم: عیراق وڵاتێکی عەرەبییە و گەلی عەرەب خاوەنی ئەم وڵاتەیە.
دوەم: گەلی عەرەب خاوەنی پەیامێکی مەزن و ئاسمانییە و یەکبونی عەرەب لە گرەوی ئەوەدایە کە هەم عەرەببونی عیراق و هەم پەیامە پیرۆزەکەی بە ڕەسمی بناسرێ.
سێهەم: هەرجۆرە سەرکێشییەک لەگەڵ ئەو دو بنەمایەی سەرەوە بەلای نەتەوەپەرستان( و تەنانەت ئیسلامگەرا توندرەوەکان)ی گەلی عەرەبەوە بە واتای کفر و هەڵگەرانەوەیە لەو "براگەورە" یەی کە هەم بە حوکمی قانونی ئاسمان و هەم بە حوکمی یاساکانی سەر زەوی بۆیان هەیە هەرچی زەهری شۆڤێنیزم و ڕقی کۆنەپەرستانەیە بەسەر ناحەزەکانیانا بڕێژن.

لەم دە سالەی رابوردودا بۆمان ساغ بۆتەوە کە ئاقای نوری مالیکی بە پێێ بنەماکانی دیموکراسی ناڕوات بەڕێوە.

بە پیێ پرەنسیپەکانی دیموکراسی بێت میللەتان مافی خۆیانە شێوەی ژیان خۆیان دیاری بکەن...

بە پێی پرەنسیپەکانی دیموکراسی بێت برایەتی و تەبایی نیوان گەلان بەردی بناغەیە بۆ ئاشتییەکی هەمیشەیی، سەرکوت و چەوساندنەوە لەگەل برایەتی تەباییدا نایەتەوە..

بە پیێ بنەماکانی ئازادی بێت گەلی گورد لە عیراقدا بەشێوەی فیدراڵی و بە پیی دەستورێکی نوسراو لەگەڵ حکومەتی بەغدا ئەژی و ئەم مەسەلەیە ساڵەهایە کە تەوافوقی لەسەر ئەنجامدراوە و بڕاوەتەوە..

نوری مالیکی گەلی کوردی خۆشناویت و بڕوای بە مافەکانی ئەم گەلە نییە لە ئازاد بون و ئازاد ژیان و سەربەخۆبون و شادبوون بە مافی چارەیخۆنوسین..

ئەو ئێمەی خۆشناوێت.. کەواتە ئەو بڕوای بە مافەکانی ئیمە نییە.. ئەبێ ئەو ئێمەی خۆش بوێت وەک ئینسان ئنجا بڕوا بە مافەکانمان ئەهینێ...ئەو خۆشەویستی نازانێ.. بڕوای بەوەیە کە عەرەبەکانی عیراق براگەورەی ئیمەن و پەیامێکی پیرۆز هەیە کە ئەبێ ئەوان بە جیهاندا بلاوی بکەنەوە .. هەر ئەوان و کەسی تر نا.. خۆسەویستی لە ئارادا نییە..

خوێندراوەتەوە1330